شہریوں کو اب مقررہ مدت کے اندر پاسپورٹ ملیں گے، محسن نقوی
کراچی: وفاقی وزیرداخلہ محسن نقوی نے کہا ہے کہ شہریوں کو اب مقررہ مدت کے اندر پاسپورٹ ملیں گے۔
وزیرداخلہ محسن نقوی کے پاسپورٹ آفس عوامی مرکز اور نادرا سنٹر ڈیفنس کے اچانک دورہ کیا اور پاسپورٹ و شناختی کارڈز بنوانے کے لئے آئے شہریوں سے ملاقات کی۔
محسن نقوی نے پاسپورٹ اور شناختی کارڈز بنوانے کے عمل کے بارے پوچھا، شہریوں نے پاسپورٹ و شناختی کارڈز بنوانے کے نظام کو سراہا اور اطمینان کا اظہار کیا۔
شہریوں نے وفاقی وزیر سے گفتگو کرتے ہوئے کہا کہ پاسپورٹ کی تجدید کے لئے آئے ہیں اور چند منٹ میں کام ہو بھی گیا ہے، پاسپورٹ بنوانے میں کوئی مشکل پیش آئی نہ ہی انتظار کرنا پڑا۔
محسن نقوی کا کہنا تھا کہ شہریوں کو پاسپورٹ ملنے میں تاخیر کا ازالہ کیا جا رہا ہے، شہریوں کو اب مقررہ مدت کے اندر پاسپورٹ ملیں گے۔
دورے دوران وزیرداخلہ نے بعض شہریوں کے شناختی کارڈز کے ایشوز کو موقع پر ہی حل کرنے کے لیے احکامات دیے، پاسپورٹ و نادرا سنٹرز کے عملے سے بھی ملاقات کی اور انہیں شاباشی بھی دی۔
محسن نقوی نے نادرا سنٹر ڈیفنس میں صفائی کا نظام بہتر بنانے کا حکم دیا اور کہا کہ شہریوں کی سہولت کیلئے پاسپورٹ آفس اور نادرا سنٹرز کے دورے کر رہا ہوں، کراچی میں شہریوں نے پاسپورٹ اور نادرا سنٹرز میں نظام کو سراہا جو اطمینان کی بات ہے۔
