وزیراعظم کی سعودی ولی عہد کے خصوصی مکالمے اور گالا ڈنر میں شرکت
وزیر اعظم محمد شہباز شریف نے ریاض میں ورلڈ اکنامک فورم کے خصوصی اجلاس کے موقع پر سعودی ولی عہد شہزادہ محمد بن سلمان کی جانب سے دیئے گئے خصوصی مکالمے اور گالا ڈنر میں شرکت کی۔
تقریب کے دوران وزیراعظم نے سعودی ولی عہد سے مختلف امور پر تبادلہ خیال کیا اور ڈبلیو ای ایف کے خصوصی اجلاس کے کامیاب انعقاد اور میزبانوں کے شاندار انتظامات پر سعودی قیادت کو مبارکباد دی۔
وزیراعظم اور سعودی ولی عہد نے دوطرفہ تعلقات کے علاوہ علاقائی صورتحال بالخصوص غزہ کے بحران کے حوالے سے بھی تبادلہ خیال کیا۔
اس موقع پر وزیر اعظم نے حرمین شریفین کے متولی شاہ سلمان بن عبدالعزیز آل سعود کی صحت، خوشی اور درازی عمر کے لیے اپنی دعائیں اور نیک خواہشات کا بھی اظہار کیا۔
دوران تقریب وزیراعظم نے ولی عہد شہزادہ محمد بن سلمان کو جلد از جلد پاکستان کا سرکاری دورہ کرنے کی دعوت بھی دی۔
رمضان المبارک میں سعودی عرب کے دورے کے دوران مکہ مکرمہ میں ہونے والی اپنی حالیہ ملاقات کو یاد کرتے ہوئے وزیراعظم نے وزیر خارجہ شہزادہ فیصل بن فرحان بن عبداللہ کی قیادت میں اعلیٰ اختیاراتی وفد پاکستان بھیجنے پر ولی عہد کا شکریہ ادا کیا۔
بعدازاں سعودی وفد نے اپنے پاکستانی ہم منصبوں کے ساتھ پاکستان میں سعودی سرمایہ کاری کے پورٹ فولیو کو بڑھانے کے طریقوں پر تفصیلی تبادلہ خیال کیا۔
تقریب کے دوران وزیراعظم نے سعودی وفد کو بتایا کہ وہ اپنے ساتھ ایک اعلیٰ اختیاراتی وفد کو ریاض لائے ہیں، جس میں سرمایہ کاری کے ذمہ دار اہم وزراء بھی شامل ہیں تاکہ متعلقہ حکام کے درمیان فالو اپ میٹنگز ہو سکیں۔
