اسموگ کے خاتمے کیلئے حکومت نے اہم فیصلہ کر لیا
اسموگ کے خاتمے کیلئے حکومت نے اہم فیصلہ کر لیا ہے۔
صوبائی وزیر اطلاعات مریم اورنگزیب کا کہنا ہے کہ وزیراعلیٰ پنجاب مریم نواز کی زیر صدارت اجلاس میں اسموگ کابینہ کمیٹی بنانے کا فیصلہ کیا گیا جب کہ پلاننگ اینڈ ڈیولپمنٹ میں اسموگ مانیٹرنگ سیکٹورل سیل بنایا گیا ہے۔
انہوں نے کہا کہ ماحول کی بہتری کیلئے لیگل فریم ورک بنانے کا کام شروع کر دیا ہے جبکہ قوانین اور ضابطوں پرعمل درآمد کیلئے ہنگامی اقدامات کا ایکشن پلان بھی تیار کر لیا گیا ہے۔ اس کے علاوہ ماحول کے تحفظ کے لیے خصوصی فورس بنانے کا بھی فیصلہ کیا ہے۔
وزیر اطلاعات پنجاب نے کہا کہ کون سا شعبہ اسموگ میں کتنے اضافے کی وجہ بن رہا ہے اس حواے سے ڈیجیٹل ڈیٹا جمع کیا جائے گا، زہریلے دھوئیں پر کنٹرول کیلئے صنعتوں کو “ایمشن کنٹرول سسٹمز” لگانے کا پابند کرنے کا نظام تیار کر لیا ہے۔
مریم اورنگزیب نے کہا کہ اب زگ زیگ ٹیکنالوجی کے بغیر کوئی بھٹہ نہیں چلے گا، اس ٹیکنالوجی کے بغیر چلنے والے بھٹوں کو بند کر رہے ہیں۔
وزیر اطلاعات پنجاب نے کہا کہ گاڑیوں کے لیے فٹنس سرٹیفکیٹ لازمی قرار دیا جا رہا ہے جبکہ زیادہ دھواں چھوڑنے اور خراب انجن والی گاڑیوں کو بند کیا جائے گا۔
