پاک نیوزی لینڈ سیریز کے لیے پنجاب پولیس کے سیکیورٹی اور ٹریفک انتظامات مکمل
لاہور: پاکستان اور نیوزی لینڈ کے درمیان ہونے والی ٹی ٹوئنٹی سیریز کے لیے پنجاب پولیس نے سیکیورٹی اور ٹریفک انتظامات مکمل کرلیے۔
آئی جی پنجاب ڈاکٹر عثمان انور کی زیر نگرانی پولیس فورس کھلاڑیوں، میچ آفیشلز اور شائقین کو بھرپور سیکیورٹی فراہم کرنے کے لیے پرعزم ہیں۔
آئی جی پنجاب ڈاکٹر عثمان انور کہتے ہیں کہ ٹی ٹونٹی سیریز کا پہلا میچ آج شام راولپنڈی کرکٹ اسٹیڈیم میں کھیلا جائے گا۔ پر امن اور محفوظ ماحول میں میچز کا انعقاد یقینی بنانے کے لئے پہلے سے بہتر حکمت عملی اپنائی ہے۔
آئی جی پنجاب کا کہنا ہے کہ پاکستان کرکٹ بورڈ، ضلعی انتظامیہ، سیکیورٹی ایجنسیز سمیت تمام اداروں سے کوارڈینیشن مکمل ہے، راولپنڈی اور لاہور میں پانچ میچز پر 15 ہزار سے زائد افسران و اہلکار سیکیورٹی ڈیوٹی انجام دیں گے۔
آئی جی پنجاب نے ہدایت کی کہ ہوٹل، روٹس اور اسٹیڈیمز کے اطراف سرچ، سوئپ، کومبنگ اور انٹیلی جنس بیسڈ آپریشنز جاری رکھے جائیں گے، سیف سٹیز اتھارٹی کے کیمروں کی مدد سے اسٹیڈیمز، ہوٹلز اور ٹیموں کے روٹ کی مانیٹرنگ یقینی بنائی جائے۔
انہوں نے بتایا کہ خواتین شائقین کرکٹ کی سیکیورٹی اور چیکنگ کے لئے لیڈی پولیس اہلکار تعینات کی جائیں گی، ٹریفک کا بلاتعطل بہاؤ، مناسب پارکنگ یقینی بنانے کے لئے ٹریفک پلان پر عملدرآمد یقینی بنایا جائے گا۔
ڈاکٹر عثمان انور نے کہا کہ ڈولفن اسکواڈ، پولیس رسپانس یونٹ، ایلیٹ فورس کی ٹیمیں میچز کے دوران موثر پیٹرولنگ کریں۔ اسٹیڈیمز کے داخلی و خارجی راستوں اور انٹری گیٹس پر تعینات عملہ شہریوں کے ساتھ خوش اخلاقی سے پیش آئے۔
آئی جی پنجاب نے مزید کہا کہ شائقین کرکٹ محفوظ ماحول میں میچز سے لطف اندوز ہونے کے لئے پنجاب پولیس کی ہدایات پر عمل کریں۔
واضح رہے کہ پاکستان اور نیوزی لینڈ سیریز کے ابتدائی 3 میچ راولپنڈی جب کہ آخری دو میچز لاہور میں کھیلے جائیں گے۔
