پرتگال کے جنگلات میں لگنے والی خوفناک آگ بے قابو ہو گئی ہے حکام نے یورپی ممالک سے مدد کی اپیل کر دی ہے۔
ضلع اویرو میں 800 سے زائد فائر فائٹرز آگ پر قابو پانے میں مصروف ہیں، جہاں پولیس نے موٹر ویز کو بند کردیا اور متعدد دیہات کو خالی کرا لیا۔
پرتگال نے پیر کے روز آگ بجھانے کے لیے مزید طیاروں کی ضرورت پر زور دیا ہے کیونکہ وسطی اور شمالی علاقوں میں کم از کم 15 مقامات پر آگ لگی ہوئی ہیں، جن میں سے ایک میں البرگریا ویلہا قصبے کے مضافات میں واقع مکانات جل کر خاکستر ہو چکے ہیں۔
تیز ہواؤں اور تیز درجہ حرارت کی وجہ سے لگنے والی آگ سے نکلنے والے گہرے دھوئیں نے علاقے کو اپنی لپیٹ میں لے لیا۔
حکام کا کہنا ہے کہ انہوں نے اس ضلع میں پانی سے آگ بجھانے والے آٹھ طیارے تعینات کیے ہیں۔
حکومت نے یورپی یونین کے سول پروٹیکشن میکانزم کے تحت یورپی کمیشن سے مزید طیاروں کی درخواست کی جسے ریسی ای یو کے نام سے جانا جاتا ہے۔
البرگاریا ویلہا کے میئر انتونیو لوریرو نے خبر رساں ادارے کو بتایا کہ تقریبا 25 ہزار کی آبادی والے شہر کے صنعتی اور رہائشی احاطے میں آگ بھڑک اٹھی ہے۔
حکام کا کہنا ہے کہ ملک بھر میں مجموعی طور پر 1500 فائر فائٹرز تعینات ہیں جہاں ہفتے کے اختتام پر درجہ حرارت 30 ڈگری سینٹی گریڈ تک پہنچ گیا تھا اور پیر اور منگل کو بھی درجہ حرارت بلند رہنے کا امکان ہے۔
پرتگال اور ہمسایہ ملک اسپین میں سال کے آغاز کے بعد معمول سے کم آگ لگی ہے۔ لیکن دونوں تیزی سے گرم اور خشک حالات کے خطرے سے دوچار ہیں جس کا ذمہ دار سائنسدانوں نے گلوبل وارمنگ کو قرار دیا ہے۔
