عوام کیلئے ایک اور بری خبر؛ وزیرخزانہ کا اہم اعلان
وزیرخزانہ محمد اورنگزیب نے عوام کیلئے اہم اعلان کر دیا ہے۔
وزیر خزانہ و محصولات محمد اورنگزیب نے نجی ٹی وی چینل کے پروگرام میں گفتگو کرتے ہوئے کہا ہے کہ اس بجٹ کو ہمیں ایک روڈ میپ کے طور پر دیکھنا ہوگا۔
انہوں نے کہا کہ پاکستان ٹیکس ٹو جی ڈی پی ساڑھے نو فیصد کا متحمل نہیں ہوسکتا، ہمیں اسے 13 فیصد تک لے جانا ہوگا، لوگ ٹھیک کہتے ہیں کہ نان فائلرز کی کیٹیگری کو ختم ہی کردیں، یہ دنیا کا واحد ملک ہوگا جس میں نان فائلرز کی اختراع ہے۔
محمد اورنگزیب نے کہا کہ ہم نان فائلرز کیلئے قیمتوں کو اس انتہائی لیول تک لے گئے ہیں کہ وہ تین سے چار مرتبہ سوچیں گے ضرور کہ نان فائلر رہنا ہے یا نہیں، آنے والے سالوں میں ہم ”نان فائلرز“ کو ڈکشنری سے باہر کردیں گے۔
وزیر خزانہ نے کہا کہ ہمیں ڈیجیٹل اکنامی کی طرف جانا ہے اور بہت اہم ہے، کیونکہ اس سال ہمارا آمدن کا ہدف 9.4 ٹریلین روپے تھا، ہم اس کے کافی قریب 9.3 ٹریلین روپے تک پہنچے بھی، لیکن اس کے مقابلے میں دیکھیں تو 9 ٹریلین روپے کیش گردش میں ہے اور سسٹم سے باہر ہے، اس پیسے کو اکنامی میں لانے کیلئے ڈیجیٹلائزیشن کی ضرورت ہے۔
انہوں نے کہا کہ وزیراعظم جلد ہی اعلان کریں گے کہ وہ ڈیجیٹل انیشی ایٹیو کو آگے لے کر جا رہے ہیں اور اس کی سربراہی کیلئے پرائیویٹ سیکٹر سے کسی کو لایا جائے گا۔
محمد اورنگزیب نے کہا کہ وزیراعظم کی ہدایت کے مطابق صوبوں میں جو ایگریکلچر اور پراپرٹی ٹیکسز ہیں اس پر ہم نے صوبوں سے بات شروع کی ہے، وفاق کی کُل آمدن کا 59.5 فیصد صوبوں کو این ایف سی ایوارڈ کی صورت میں جارہا ہے۔
وزیر خزانہ نے کہا کہ صوبوں سے ہم نے یہ بات کی ہے کہ اب یہ قابل برداشت نہیں ہے، جس کا مطلب ہے کہ اب آپ کو متحرک ہونا چاہیے کیونکہ اگر آپ زراعت یا پراپرٹی کو ٹیکس نیٹ میں نہیں لے کر آئے تو پائیدار نہیں رہے گا۔
انہوں نے کہا کہ اسی طرح کچھ اخراجات کی حصہ داری ہے، جیسے کہ سوشل پروٹیکشن، یہ بھی کرنی ہوگی، صوبوں کو دے کر اور سود ادا کرکے باقی جو بھی ہم کر رہے ہیں سب ادھار لے کر کر رہے ہیں۔
محمد اورنگزیب نے کہا کہ میں وزیراعظم کے ساتھ دو مرتبہ سعودی ولی عہد سے مل چکا ہوں، ملک کیلئے 5 ارب ڈالرز کی سرمایہ کاری موجود ہے، اب ہمیں یہ کرنا ہے کہ قابل سرمایہ اور منافع بخش پروجیکٹس شروع کرنے ہیں، پائپ لائن میں کئی چیزیں ہیں اور آپ کو خوشخبری ملے گی۔
