وفاقی بجٹ سے قبل مہنگائی کا پارہ پھر سے ہائی ہونے لگا
اسلام آباد: وفاقی بجٹ سے قبل ہفتہ وار مہنگائی کا پارہ پھر سے ہائی ہونے لگا۔
رواں ہفتے مہنگائی کی شرح میں 0 اعشاریہ 45 فیصد کا اضافہ ریکارڈ کیا گیا ہے جب کہ مہنگائی کی ہفتہ وار بنیادوں پر سالانہ شرح 21 اعشاریہ 69 فیصد ریکارڈ کی گئی ہے۔
ادارہ شماریات نے مہنگائی سے متعلق ہفتہ وار رپورٹ جاری کردی ہے جس کے مطابق ایک ہفتے کے دوران 19 اشیاء مہنگی اور 14 کی قیمتوں میں کمی ہوئی۔
ادارہ شماریات کے مطابق رواں ہفتے کے دوران پیاز کی فی کلو قیمت 33 روپے 39 پیسے، ٹماٹر فی کلو 10 روپے 6 پیسے اور کیلا فی درجن 7 روپے 26 پیسے مہنگا ہوا جب کہ مصالحہ جات 10 روپے اور آلو کی فی کلو قیمت 2 روپے 36 پیسے بڑھ گئی۔
رپورٹ میں کہا گیا ہے کہ رواں ہفتے چکن کی فی کلو قیمت میں 5 روپے 91 پیسے کا اضافہ ہوا۔ گڑ، ایل پی جی، سیگریٹ اور دال ماش بھی مہنگی ہونے والی اشیاء میں شامل ہیں۔
رواں ہفتے کے دوران پیٹرولیم مصنوعات کی قیمتوں میں کمی ہوئی اور پیٹرول کی فی لیٹر قیمت 4 روپے 78 پیسے کم ہوئی جب کہ بریڈ کی قیمت میں 3 روپے 5 پیسے کی کمی ریکارڈ کی گئی۔
رپورٹ میں بتایا گیا ہے کہ ایک ہفتے کے دوران انڈے فی درجن 2 روپے 27 پیسے سستے ہوئے، چاول، چلی پاؤڈر، خشک دودھ، چینی اور دال مونگ بھی سستی ہونے والی اشیاء میں شامل ہیں۔
علاوہ ازیں رواں ہفتے بیف، دہی اور چائے کی پتی سمیت 18 اشیاء کے دام مستحکم رہے۔
