پونٹنگ اور اینڈی فلاور کے بعد جسٹن لینگر کا بھی بھارتی ٹیم کی کوچنگ سے انکار
سابق آسٹریلوی کپتان رکی پونٹنگ اور زمبابوین کھلاڑی اینڈی فلاور کے بعد آسٹریلوی کھلاڑی جسٹن لینگر نے بھی بھارتی ٹیم کی کوچنگ سے انکار کردیا۔
میڈیا رپورٹس کے مطابق سابق آسٹریلوی کرکٹر جسٹن لینگر نے ایک پوڈکاسٹ میں گفتگو کرتے ہوئے کہا کہ بھارتی ٹیم کی کوچنگ ایک شاندار جاب ہے لیکن میں نے خود کو اس دوڑ سے باہر رکھا ہے۔
جسٹن لینگر نے کہا کہ آسٹریلوی ٹیم کے ساتھ چار سال کوچنگ کی، ایمانداری کی بات ہے یہ تھکا دینے والا کام ہے، بھارتی ٹیم کے حوالے سے لکھنؤکے کپتان کے ایل راہول سے بات چیت ہوئی تھی۔
انہوں نے کہا کہ میں نے بھارت میں پریشر کے حوالے سے بھی بات کی، کے ایل راہول نے بتایا کہ اگر آئی پی ایل میں دباؤ اور سیاست ہے تو اسے بھارتی کوچنگ کے لیے ہزار گنا کرلیں، میرے خیال میں یہ ایک اچھا مشورہ تھا یہ ایک شاندار جاب ہوگی لیکن میرے لیے نہیں۔
دوسری جانب بی سی سی آئی کے سیکرٹری جے شاہ کا کہنا ہے کہ بورڈ کی جانب سے کسی آسٹریلوی کرکٹر سے کوچنگ کے لیے رابطہ ہی نہیں کیا گیا۔
واضح رہے کہ بھارتی کرکٹ بورڈ اس وقت نئے ہیڈ کوچ کی تلاش میں ہے۔
