خارکیف میں روسی میزائل حملے سے مقامی ٹیلی ویژن کا ٹاور تباہ
خارکیف میں روسی میزائل حملے میں مقامی ٹیلی ویژن کا ٹاور تباہ ہوگیا۔
غیر ملکی خبر رساں ادارے کی رپورٹ کے مطابق یوکرین کے شہر خارکیف میں روسی فوج کے میزائل حملے میں مقامی ٹیلی ویژن کا 240 میٹر کا بلند و بالا ٹاور دو ٹکڑے ہوکر تباہ ہوگیا۔
یوکرینی حکام کا کہنا ہے کہ روس کی جانب سے خارکیف کے ٹیلی ویژن ٹاور کو نشانہ بنایا گیا ہے جب کہ حملے کے بعد ٹیلی ویژن کے سگنلز میں خلل آیا تاہم کوئی جانی نقصان نہیں ہوا۔
یوکرین کے صدر ولادیمیر زیلنسکی کہتے ہیں کہ روس نے ٹی وی ٹاور پر حملے میں ممکنہ طور پر کروز میزائل استعمال کیا ہے۔
انہوں نے کہا کہ یہ روس کی واضح کوشش تھی کہ خارکیف کی مواصلات اور معلوم تک رسائی کو محدود کیا جائے جب کہ حملے کے حوالے سے امریکی صدر جوبائیڈن کو آگاہ کردیا گیا ہے۔
خیال رہے کہ 1.3 ملین آبادی پر مشتمل یہ شہر روسی سرحد سے صرف 30 کلو میٹر کے فاصلے پر واقع ہے جب کہ یوکرین کے فضائی دفاع میں کمی کے بعد روس باآسانی اس شہر کو بیلسٹک میزائل اور دیگر ہتھیاروں سے نشانہ بناتا رہا ہے۔
روس نے گذشتہ ماہ توانائی کے نظام کو نشانہ بناتے ہوئے بجلی کی تنصیبات کو خاصا نقصان پہنچایا تھا۔
