لاس اینجلس میں لگی آگ پر قابو نہ پایا جاسکا، ہلاکتوں کی تعداد 16 ہوگئی – پاک لائیو ٹی وی

امریکی ریاست کیلیفورنیا کے شہر لاس اینجلس میں کئی روز سے لگی آگ پر مکمل قابو نہ پایا جاسکا۔

امریکی میڈیا کے مطابق تیز ہواؤں سے ایک اور مقام پر آگ بھڑک اٹھی، آگ سے 16 افراد ہلاک اور سیکڑوں زخمی جبکہ 13 افراد لاپتہ ہیں۔

میڈیا رپورٹس میں بتایا گیا ہے کہ 40 ہزار ایکڑ پر عمارتیں، گھر، دفاتر، گاڑیاں جل کر خاکستر ہوگئیں اور 2 لاکھ سے زائد افراد نقل مکانی پر مجبور ہوگئے۔

امریکی میڈیا کے مطابق 12 ہزار سے زائد فائر فائٹرز، 1150 فائر انجن کی مدد سے ریسکیو آپریشن جاری ہے جبکہ 60 طیارے اور 143 واٹر ٹینکر آگ بجھانے کی کوششوں میں مصروف ہیں۔

رپورٹس میں مزید بتایا گیا کہ پیلیسیڈس میں 11، ہرسٹ میں 89 اور ایٹن میں 27 فیصد آگ پر قابو پالیا گیا ہے جبکہ آئندہ ہفتے تیز ہواؤں کی پیشگوئی سے مزید مقامات پر شعلے پھیلنے کا بھی خدشہ ہے۔