8 سال کی عمر میں جاوید میانداد اور عدنان سمیع خان کا انٹرویو لیا تھا، عائشہ عمر
پاکستان کی معروف اداکارہ عائشہ عمر کا کہنا ہے کہ 8 سال کی عمر میں جاوید میانداد اور عدنان سمیع خان کا انٹرویو لیا تھا۔
حال ہی میں پاکستان کی معروف اداکارہ عائشہ عمر نے ایک پوڈ کاسٹ میں شرکت کی جہاں انہوں نے اپنے شوبز کیریئر اور ذاتی زندگی کے بارے میں دلچسپ گفتگو کی۔
انہوں نے کہا کہ میں جب 8 سال کی تھی تو لاہور میں پی ٹی وی کے ایک شو کی میزبانی کرتی تھی۔
عائشہ عمر نے کہا کہ اس وقت منیزہ ہاشمی پی ٹی وی کی ایم ڈی تھیں اور تب وہ ایک شو ڈیزائن کر رہی تھیں جس کا نام ’میرے بچپن کے دن‘ تھا اور اُنہیں اس شو کی میزبانی کرنے کے لیے اپنے ساتھ ایک چھوٹا بچہ یا بچی بھی چاہیے تھی۔
انہوں نے کہا کہ اس شو میں بڑی عمر کی میزبان وہ خود تھیں اور میں ان کے ساتھ شو کی میزبانی کرتی تھی۔
اداکارہ نے کہا کہ میں نے اس شو میں بہت ساری نامور شخصیات کا انٹرویو کیا تھا اور مجھے ابھی تک یاد ہے کہ میں نے صرف 8 سال کی عمر میں جاوید میانداد اور عدنان سمیع خان جیسے بڑے ناموں سے بھی انٹرویو لیا تھا۔
