وزیراعظم شہباز شریف سے اسلامی تعاون تنظیم (او آئی سی) کے سیکرٹری جنرل حسین براہیم طحہٰ نے ملاقات کی، جس میں مسلم دنیا میں لڑکیوں کی تعلیم، فلسطین اور کشمیر سمیت دیگر اہم امور پر تبادلہ خیال کیا گیا۔
وزیراعظم نے مسلم ممالک میں لڑکیوں کی تعلیم سے متعلق بین الاقوامی کانفرنس میں شرکت پر سیکرٹری جنرل کا شکریہ ادا کیا اور اس کانفرنس کو مسلم دنیا میں خواتین کی معیاری تعلیم اور بااختیار بنانے کے لیے ایک اہم پیش رفت قرار دیا۔
وزیراعظم نے او آئی سی کے متحرک کردار کو سراہتے ہوئے تنظیم کے مشترکہ ترجیحات اور مقاصد کو آگے بڑھانے کے لیے پاکستان کی مکمل حمایت کا اعادہ کیا۔
انہوں نے او آئی سی کو مسلم امہ کی اجتماعی آواز کے طور پر مزید فعال بنانے کے عزم کا اظہار بھی کیا۔
وزیراعظم نے جموں و کشمیر تنازعے کے حل کے لیے او آئی سی کے اصولی موقف اور مسلسل حمایت پر شکریہ ادا کیا۔
اس موقع پر سیکرٹری جنرل نے کشمیری عوام کے حق خود ارادیت کی جائز جدوجہد میں او آئی سی کی مکمل حمایت کا اعادہ کیا اور اس سلسلے میں تنظیم کی جاری سفارتی کوششوں سے وزیراعظم کو آگاہ کیا۔
وزیراعظم نے فلسطین میں اسرائیلی جارحیت کی شدید مذمت کرتے ہوئے غزہ میں فوری اور غیر مشروط جنگ بندی کی ضرورت پر زور دیا۔
انہوں نے فلسطینی عوام کے لیے انسانی امداد کی بلاتعطل فراہمی اور اسرائیل کے وسیع پیمانے پر جنگی جرائم کے خلاف عالمی احتساب کی ضرورت کو اجاگر کیا۔
ملاقات میں اس بات پر بھی اتفاق کیا گیا کہ او آئی سی کو غزہ میں جنگ بندی کے لیے عالمی برادری پر دباؤ جاری رکھنا چاہیے۔
دونوں رہنماؤں نے اسلامو فوبیا سے نمٹنے کے لیے مشترکہ کوششوں پر تبادلہ خیال کیا اور مشترکہ دلچسپی کے علاقائی و عالمی امور پر گفتگو کی۔
سیکرٹری جنرل نے پاکستان کے قائدانہ کردار کو سراہتے ہوئے کہا کہ لڑکیوں کی تعلیم پر بین الاقوامی کانفرنس کا انعقاد مسلم امہ کے مسائل کے حل کے لیے پاکستان کی سنجیدہ کاوشوں کی عکاسی کرتا ہے۔
ملاقات میں دونوں فریقین نے اس امر پر بھی اتفاق کیا کہ مسئلہ فلسطین کا حل اقوام متحدہ کی قراردادوں اور فلسطینی عوام کی امنگوں کے مطابق ہونا چاہیے۔
