پلے اسٹور سے یہ ایپس ہرگز ڈائون لوڈ نہ کریں، ورنہ۔۔۔!
سائبرسکیورٹی الرٹ میں بتایا گیا ہے کہ گوگل پلے اسٹور سے ڈاؤن لوڈ کی جانے والی مختلف ایپلی کیشنز کے ذریعے ہیکرز حساس ڈیٹا چوری کر سکتے ہیں۔
سروسزاینڈ جنرل ایڈمنسٹریشن ڈیپارٹمنٹ حکومت پنجاب کی جانب سے صوبہ بھر کے ایڈمنسٹریٹو سیکرٹریز، آئی جی پنجاب پولیس سمیت تمام کمشنرز، ڈپٹی کمشنرز کو ایک مراسلہ جاری کیا گیا ہے۔
جاری کردہ مراسلے میں بتایا گیا ہے کہ کیبنٹ سیکرٹریٹ کیبنٹ ڈویژن حکومت پاکستان کی جانب سے موصول شدہ سائبرسکیورٹی الرٹ میں بتایا گیا ہے کہ گوگل پلے اسٹور سے ڈاؤن لوڈ کی جانے والی مختلف ایپلی کیشنز کے ذریعے ہیکرز حساس ڈیٹا چوری کر سکتے ہیں۔
مراسلے کے مطابق ان میں آن لائن شاپنگ، الیکٹریسٹی بل چیکر، پاک ای سروسز 2024 ،سوئی گیس بل ویوور، انٹیلی جنس ایم سی کیوزٹیسٹ اور انیشل ٹیسٹ پریپریشن جیسی مشکوک ایپس شامل ہیں۔
تمام ادارے متعلقہ شعبہ جات کو الرٹ کر دیں کہ ایسی مشکوک ایپلی کیشنز کسی صورت میں ڈاؤن لوڈ نہ کریں اور اس حوالے سے بتائے گئے ایس او پیز پر عملدرآمد کو یقینی بنائیں۔
دوسری جانب پاکستان میں ڈاٹ پی کے ڈومین رکھنے والی ویب سائٹس سے لاکھوں افراد کا ڈیٹا چوری ہو گیا ہے۔
اس حوالے سے روسی سائبر سکیورٹی کمپنی کیسپرسکی نے انکشاف کیا کہ پاکستان میں ڈاٹ پی کے ڈومین رکھنے والی ویب سائٹس ہیکرز کا آسان ہدف ہیں اور 2023 کے دوران ڈاٹ پی کے ڈومین کی حامل ویب سائٹس سے 24 لاکھ افراد کا ڈیٹا چوری کیا جا چکا ہے۔
