مودی سرکار کی اگنی پتھ اسکیم پر کانگریس کی کڑی تنقید
نئی دہلی: مودی سرکار کی اگنی پتھ اسکیم پر اپوزیشن جماعت کانگریس کی جانب سے شدید تنقید کی جارہی ہے۔
اہم ریاستی ادارں کے ساتھ بھارتی فوج بھی مودی سرکار کے نشانے پر ہے جب کہ مودی نے اقتدار سے چمٹے رہنے کے لئے بھارت کے عسکری ادارے کو بھی نہیں بخشا ہے۔
مذموم سیاسی ایجنڈے کی تکمیل کے لئے مودی سرکار فوج اور اس کے لئے مختص وسائل پر بھی قابض ہوگئی ہے۔
کانگریس کے رہنما راہول گاندھی نے مودی سرکار کی جانب سے بھارتی فوج کے لئے متعارف کرائی گئی اگنی پتھ اسکیم کو شدید تنقید کا نشانہ بنایا۔
راہول گاندھی کا کہنا تھا کہ مودی کی اگنی پتھ اسکیم زبردستی مسلط کی گئی ہے، مسلح افواج میں بھرتی ہونے کے لئے اگنی پتھ اسکیم ان بہادر نوجوانوں کی توہین ہے جو ملک کے دفاع کا خواب دیکھتے ہیں۔
سماجی رابطے کی سائٹ ایکس پر اگنی پتھ اسکیم کو آڑے ہاتھوں لیتے ہوئے راہول گاندھی کا کہنا تھا کہ یہ سب کچھ بھارتی فوج نہیں بلکہ مودی سرکار کا گھٹیا منصوبہ ہے۔
گانگریس رہنماؤں نے اس اسکیم کی سختی سے مخالف کرتے ہوئے کہا کہ حکومت بنتے ہی کانگریس اگنی پتھ اسکیم کو ختم کرتے ہوئے افواج کو معاشی سماجی تحفظ کی ضمانت دے گی۔
گذشتہ ماہ بھی راہول گاندھی نے اگنی پتھ اسکیم کی مخالفت کرتے ہوئے انکشاف کیا تھا کہ فوجیوں کی پینشن کے لئے مختص رقم اڈانی ڈیفنس کو جاتی ہے، اڈانی گروپ اگنی پتھ کے ذریعے حاصل ہونے والی رقم سے امریکی اور اسرائیلی کمپنیوں کے ساتھ شراکت داری کرے گا۔
