![](https://www.bolnews.com/urdu/wp-content/uploads/2024/04/WhatsApp-Image-2024-04-18-at-4.11.52-PM-635x380.jpeg)
اداکاراؤں کی اسکرین پر نظر آنے والی خوبصورتی سے متاثر نہ ہوں، مشی خان
پاکستان شوبز انڈسٹری کی معروف و سینئر اداکارہ مشی خان نے کہا ہے کہ اداکاراؤں کی اسکرین پر نظر آنے والی خوبصورتی سے متاثر نہ ہوں۔
حال ہی میں اداکارہ مشی خان نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر اپنی ایک ویڈیو پوسٹ کی جس میں انہوں نے کہا کہ ہم سب لوگ ہی فلٹرز کا استعمال کرتے ہیں لیکن اس کا مطلب یہ نہیں ہے کہ ہم حقیقت سے نظریں چرائیں۔
انہوں نے کہا کہ شوبز میں جتنے بھی لوگ ہیں ان کی اچھی تصاویر، اچھے میک اپ، لائٹنگ اور فلٹرز کا نتیجہ ہیں ورنہ ہم سب اداکار بھی باقی لوگوں کی طرح ہی نظر آتے ہیں اور ہماری جلد بھی بالکل عام لوگوں جیسی ہی ہوتی ہے۔
ان کا کہنا تھا کہ ہم اداکاراؤں کو بھی آنکھوں کے نیچے ہلکے پڑنا، ایکنی اور چھائیاں جیسے مسائل کا سامنا رہتا ہے۔
مشی خان نے کہا کہ وہ اسکرین پر نظر آنے والی اداکاراؤں کی خوبصورتی کو دیکھ کر احساسِ کمتری کا شکار ہوکر زہریلی کریموں کا استعمال کرکے اپنی زندگی کو داؤ پر نہ لگائیں کیونکہ ایسا کرنے سے آپ کینسر جیسے جان لیوا مرض میں بھی مبتلا ہوسکتی ہیں۔
اُنہوں نے خواتین کا حوصلہ بڑھاتے ہوئے کہا کہ اللّٰہ نے آپ کو جیسا بھی بنایا ہے، اس پر اللّٰہ کا شکر ادا کریں اور خوش رہیں۔