پولیس کو اگلے حکم تک ہائی الرٹ کیا جائے، وزیر داخلہ سندھ کی آئی جی کو ہدایت
کراچی: وزیر داخلہ سندھ ضیا الحسن لنجار نے آئی جی سندھ غلام نبی میمن کو ہدایت دی ہے کہ سندھ پولیس کو اگلے حکم تک ہائی الرٹ کیا جائے۔
صوبائی وزیر ضیا الحسن لنجار نے اپنے جاری کردہ بیان میں کہا کہ رحیم یار خان میں دہشتگرد حملے میں پولیس اہلکاروں کی شہادت قابل مذمت اور افسوسناک ہے، افسران اور جوانوں کے حوصلے پست نہیں کیے جاسکتے، اللہ شہداء کے درجات بلند فرمائے اور لواحقین کو صبر جمیل دے۔
وزیرداخلہ سندھ نے آئی جی، ڈی آئی جی سکھر اور ایس ایس پی گھوٹکی کو ہدایت دی کہ پنجاب پولیس سے مستقل رابطے یقینی بنائے جائیں، ڈاکوؤں کیخلاف اقدامات میں پنجاب پولیس سے ہرممکن تعاون کیا جائے۔
اس سے قبل وزیراعلیٰ سندھ مراد علی شاہ نے بھی شہید پولیس اہلکاروں کے خاندانوں سے تعزیت کا اظہار کرتے ہوئے آئی جی سندھ کو پنجاب پولیس سے رابطے کی ہدایت کی ہے۔
مراد علی شاہ کا کہنا تھا کہ پنجاب پولیس کو جو بھی مدد درکار ہے وہ فوری کی جائے، ڈاکوؤں کے خلاف سندھ، پنجاب اور بلوچستان پولیس مشترکہ آپریشن کی منصوبہ بندی کرے۔
واضح رہے کہ رحیم یار خان کے علاقے تھانہ ماچھکہ کی حدود میں پولیس کی گاڑیوں پر ڈاکوؤں کی فائرنگ سے 12 پولیس اہلکار شہید 10 زخمی ہو گئے۔
