مشکوک بولنگ ایکشن، شکیب الحسن کو بولنگ کرانے سے روک دیا گیا
شکیب کو تمام قسم کی ڈومیسٹک اور انٹرنیشنل کرکٹ میں بولنگ کرانے سے روک دیا گیا۔
اسپورٹس ویب سائٹ کرک انفو کی رپورٹ کے مطابق بنگلہ دیش کرکٹ بورڈ (بی سی بی) نے آل راؤنڈر شکیب الحسن پر تمام ٹاپ لیول ٹورنامنٹس میں بولنگ کرنے پر پابندی لگا دی ہے۔
اس سے قبل انگلینڈ اینڈ ویلز کرکٹ بورڈ (ای سی بی) نے غیر قانونی بولنگ ایکشن کی وجہ سے شکیب کو بولنگ کرنے سے روک دیا تھا۔
رپورٹ میں کہا گیا کہ ای سی بی کی جانب سے بنگلہ دیش کرکٹ بورڈ (بی سی بی) کو مطلع کیا گیا ہے کہ قومی ٹیم کے آل راؤنڈر شکیب الحسن کے انگلینڈ اینڈ ویلز کرکٹ بورڈ (ای سی بی) کے تحت ہونے والے مقابلوں میں بولنگ کرنے پر پابندی لگا دی گئی ہے۔
ایک آزاد معائنے میں معلوم ہوا کہ شکیب کے ایکشن میں ای سی بی کے ضوابط میں تعین کردہ 15 ڈگری زاویے سے زیادہ خم پایا گیا۔
انگلش بورڈ کی جانب سے جاری ایک بیان میں کہا گیا کہ شکیب ای سی بی کےتحت کرائے جانے والے مقابلوں میں بولنگ کرنے کے لیے اس وقت تک نااہل ہیں جب تک وہ اپنے بولنگ ایکشن کے معائنے کو پاس نہیں کر لیتے۔
