وفاقی وزیر اطلاعات عطا تارڑ نے پی ٹی آئی کے احتجاج کو ملک میں فساد پھیلانے کی سازش قرار دیتے ہوئے کہا ہے کہ اس احتجاج کا مقصد صرف اور صرف انتشار پیدا کرنا ہے۔
وفاقی وزیر اطلاعات نے کہا کہ پی ٹی آئی اپنے سیاسی مقاصد کے لیے سرکاری وسائل کا استعمال کر رہی ہے اور اس کا یہ عمل قانون کے خلاف ہے۔
وزیراطلاعات نے مزید کہا کہ قانون ہاتھ میں لینے والوں کے ساتھ سختی سے نمٹاجائے گا اور اس بات کو یقینی بنایا جائے گا کہ سرکاری وسائل کا بے دریغ استعمال روکا جائے۔
انہوں نے بتایا کہ وزارت داخلہ نے اس سلسلے میں چیف سیکریٹری اور آئی جی خیبرپختونخوا کو خط لکھا ہے جس میں ہدایت کی گئی ہے کہ وہ سرکاری ملازمین کو جلسوں اور احتجاج میں شریک ہونے سے روکے۔
عطا تارڑ نے کہا کہ اسلام آباد پر لشکر کشی کی سازش کو ناکام بنادیا گیا ہے اور کسی بھی صوبے کا وفاق پر لشکر کشی کرنا سمجھ سے بالاتر ہے۔
وزیر اطلاعات نے چیف سیکریٹری کو ہدایت کی کہ وہ سرکاری اہلکاروں کو سیاسی جلسوں میں شرکت سے منع کریں، اور اگر کوئی سرکاری اہلکار اس میں شریک ہوتا ہے تو اس کے خلاف کارروائی کی جائے گی۔
انہوں نے مزید کہا کہ اسلام آباد ہائیکورٹ کی جانب سے عوام کے جان و مال کی حفاظت یقینی بنانے کی ہدایت کے مطابق، انتظامیہ کو یہ حکم دیا گیا ہے کہ وہ شہریوں کی حفاظت کو اولین ترجیح دے۔
وزیر اطلاعات نے یہ بھی کہا کہ کوئی بھی احتجاج یا جلسہ قانون کے مطابق ہوگا اور اس میں کسی بھی قسم کی خلاف ورزی برداشت نہیں کی جائے گی۔
عطاتارڑ نے کہا کہ حکومت قانون پر مکمل طور پر عملدرآمد کرائے گی اور کسی بھی قسم کے سیاسی دباؤ کو نظرانداز کرتے ہوئے انتظامیہ کو ہدایات جاری کی گئی ہیں تاکہ قانون کی حکمرانی یقینی بنائی جا سکے۔
