بلدیاتی ضمنی انتخابات میں پارٹی کی کامیابی عوام کے اعتماد کا مظہر ہے، بلاول بھٹو
پاکستان پیپلز پارٹی کے چیئرمین بلاول بھٹو زرداری نے کہا ہے کہ بلدیاتی ضمنی انتخابات میں پارٹی کی کامیابی عوام کے اعتماد کا مظہر ہے۔
پاکستان پیپلز پارٹی کے چیئرمین بلاول بھٹو زرداری نے ضمنی بلدیاتی انتخابات میں پیپلز پارٹی کی نمایاں کامیابی پر مبارکباد دی۔
انہوں نے کہا کہ کراچی سمیت سندھ بھر میں ایک بار پھر تیر چل گیا، بی بی شہید کے جیالے جیت گئے، تمام کامیاب امیدواروں کو مبارکباد اور جیالوں کو شاباش۔
ان کا کہنا تھا کہ بلدیاتی ضمنی انتخابات میں پارٹی کی کامیابی عوام کے اعتماد کا مظہر ہے، عوام نے ایک بار پھر نفرت اور تقسیم کی سیاست کو مسترد کرکے بلامتیاز عوامی خدمت کو چُنا۔
بلاول بھٹو زرداری نے کہا کہ کراچی میں پیپلز پارٹی کے امیدواروں کا بڑے مارجن سے جیت کر سوئپ کرنا تاریخی پیش رفت ہے، یقین ہے کہ پیپلز پارٹی کے نو منتخب بلدیاتی نمائندے عوام کے اعتماد پر پورا اتریں گے۔
پاکستان پیپلز پارٹی کے چیئرمین نے نومنتخب نمائندوں کے نام پیغام جاری کرتے ہوئے کہا کہ الیکشن میں کامیابی آپ کے کندھوں پر بھاری ذمہ داریاں اور امتحان لائی ہے، آپ کو محدود وسائل اور زیادہ مسائل کا سامنا ہوگا، حل پارٹی ویژن کا نفاذ اور آپ کی محنت ہے۔
یہ بھی پڑھیں: کراچی کے ضمنی بلدیاتی انتخابات میں پیپلز پارٹی نے میدان مار لیا
