جنوبی وزیرستان میں جام شہادت نوش کرنیوالے شہداء کی نماز جنازہ ادا – پاک لائیو ٹی وی

آئی ایس پی آر کا کہنا ہے کہ جنوبی وزیرستان میں جام شہادت نوش کرنیوالے شہداء کی نماز جنازہ ادا کر دی گئی۔

پاک فوج کے شعبہ تعلقات عامہ ( آئی ایس پی آر) کے مطابق 06 نومبر 2024ء کو ضلع جنوبی وزیرستان میں فتنة الخوراج کے ساتھ فائرنگ کے تبادلے میں دلیری سے لڑتے ہوئے جام شہادت نوش کرنے والے شہداء کی نماز جنازہ ادا کر دی گئی۔

آئی ایس پی آر کا کہنا ہے کہ شہید ہونے والے نائب صوبیدار تائب شاہ شہید (عمر : 38 سال، ساکن، ضلع ٹانک)، لانس نائیک گلاب زمان شہید (عمر :30 سال، ساکن، ضلع کرک)، لانس نائیک حبیب اللہ شہید (عمر : 28 سال،ساکن ، ضلع اورکزئی) اور لانس نائیک مزمل محمود شہید (عمر : 37 سال،ساکن ، ضلع کرک) کو مکمل فوجی اعزاز کے ساتھ  آبائی علاقوں میں سپرد خاک کر دیا گیا ہے۔

شہداء کی نمازِ جنازہ اور تدفین میں عسکری وسول حکام، پاک فوج کے جوانوں، شہدا کے لواحقین اور عمائدین علاقہ کی بڑی تعداد نے شرکت کی۔

آئی ایس پی آر کا کہنا ہے کہ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر شہداء کی یہ قربانیاں ہمارے عزم کو مزید تقویت دیتی ہیں۔