آئی ایم ایف مشن کے دورہ پاکستان کی تفصیلات سامنے آگئیں
اسلام اباد: عالمی مالیاتی فنڈ (آئی ایم ایف) مشن کے 11 سے 15 نومبر تک کے دورہ پاکستان کی تفصیلات سامنے آگئی ہیں۔
ذرائع کے مطابق دورے کے دوران آئی ایم ایف مشن سے 1 ارب ڈالر کلائمیٹ فنانسنگ کیلئے باضابطہ بات چیت ہوگی، موسمیاتی تبدیلیوں سے نمٹنے کیلئے بجٹ سمیت دیگر امور کا جائزہ ایجنڈے میں شامل ہے۔
مشن دورہ کے دوران بجٹ اہداف اور معاشی کارکردگی کا جائزہ بھی لے گا، پاکستان نے 2030 تک 60 فیصد متبادل ذرائع سے توانائی حصول کی یقین دہانی کرائی تھی۔
ذرائع نے بتایا ہے کہ آئی ایم ایف مشن کیساتھ نیشنل کلین ایئر پالیسی کے تحت کلائمیٹ چینج پر بات چیت ہوگی، یورو 5، یورو 6 ٹرانسپورٹ ٹیکنالوجی پالیسی پر عملدرآمد بھی بات چیت کا حصہ ہے۔
ذرائع کا کہنا ہے کہ کلین ایئر پالیسی کیلئے کریڈٹ بڑھانے سے متعلق رپورٹ مشن سے شیئر ہو گی جبکہ گرین انرجی مکس، بلین ٹری سونامی پراجیکٹ پر اقدامات سے متعلق رپورٹ بھی پیش ہوگی۔
اس کے علاوہ ماحولیاتی آلودگی کنٹرول کرنے کیلئے اقدامات سے متعلق اعدادوشمار پیش کیے جائیں گے، فصلوں کی باقیات جلانے پر پابندی عائد کرنے کے اقدامات سے متعلق رپورٹ پیش ہوگی جبکہ آئی ایم ایف مشن کیساتھ بات چیت میں موجودہ معاشی صورتحال کا جائزہ بھی شامل ہے۔
ذرائع کے مطابق رواں مالی سال کی پہلی سہ ماہی بجٹ اہداف سے متعلق رپورٹ پیش ہوگی اور معاشی اہداف، ایف بی آر کی کارکردگی اور محصولات ہدف پر بھی بات چیت ہوگی۔
اس دوران رواں مالی سال کیلئے سرکلر ڈیٹ مینجمنٹ پلان پر بھی بات چیت کا امکان ہے جبکہ توسیعی فنڈ سہولت پروگرام کے پہلے جائزے پر بات چیت ایجنڈے میں شامل نہیں۔
ذرائع نے مزید بتایا کہ ای ایف ایف قرض پروگرام کے تحت پہلا اقتصادی جائزہ 2025 کی پہلی سہ ماہی میں ہو گا، وزیر خزانہ نے دورہ واشنگٹن میں کلائمیٹ فنانسنگ کیلئے درخواست کی تھی، تاہم موسمیاتی تبدیلی کے باعث پاکستان کو سالانہ 2 ارب ڈالر کا نقصان ہو رہا ہے۔
