آئینی ترمیم کا معاملہ؛ خواجہ آصف کا نمبرز پورے ہونے کا دعویٰ
اسلام آباد: وفاقی وزیر دفاع خواجہ آصف نے 26 ویں آئینی ترمیم کے لیے نمبرز پورے ہونے کا دعویٰ کردیا۔
وزیر دفاع خواجہ آصف کا کہنا ہے کہ ترمیم کے لئے ہمارے نمبرز پورے ہیں، ایک متفقہ مسودہ تیار ہوا ہے اور کوشش ہے کہ زیادہ سے زیادہ لوگ اس ترمیم کی حمایت کریں جب کہ آج پی ٹی آئی وفد نے نے اپنے لیڈر سے اجازت مانگی اور پی ٹی آئی بھی ترمیم کو سپورٹ کررہی ہے۔
خواجہ آصف نے کہا کہ یہ بھی کہا جارہا ہے کہ لوگ اغواء ہوئے ہیں لہذا بتایا جائے کہ کون اغواء ہوا ہے اور ان کے نام بتائیں کیونکہ تمام لوگ پارلیمنٹ یا پھر اپنے گھروں میں موجود ہیں جب کہ جعلی بیانیہ بنانے والی پارٹی اس قسم کے بیانات دے رہی ہے۔
ان کا کہنا تھا کہ لاہور واقعے پر بھی سارا جھوٹ سامنے آگیا ہے، انہوں نے جھوٹے بیانیے بنانے کی فیکٹری لگائی ہوئی ہے، عدلیہ اپنی طے شدہ حدود میں رہ کر کام کرے۔ کل ایک متفقہ مسودہ تیار ہوا اور آپ نے رپورٹ بھی کیا۔
وزیر دفاع کہتے ہیں کہ ٹی وی پر دیکھا کچھ ایم این ایز اپنے لیڈر سے اختلاف کررہے ہیں لیکن شام تک امید ہے کہ اتفاق رائے ہوجائے گا ورنہ ترمیم کے لیے ہمارے نمبرز پورے ہیں۔ کچھ عرصے میں ایسے فیصلے آئے جو پارلیمنٹ کی بالادستی پر سوالیہ نشان تھے۔
انہوں نے مزید کہا کہ اسمبلی میں موجود تمام جماعتوں کا پارلیمنٹ کی بالادستی پراتفاق ہے، آئینی ترمیم کا مقصد پارلیمنٹ کی بالادستی کو قائم کرنا ہے۔
