گورنر خیبر پختونخوا فیصل کریم کنڈی کا کہنا ہے کہ پیپلز پارٹی کی قیادت اور کارکنوں نے ملک و قوم کے لیے قربانیاں دیں۔
حیدرآباد میں سانحہ کارساز کے شہدا کو خراج تحسین پیش کرنے کے لیے منعقدہ جلسے سے خطاب میں فیصل کریم کنڈی نے کہا کہ پی ٹی آئی نے ہر موقع پر ملک دشمنی کی۔
انہوں نے کہا کہ پی ٹی آئی نے آئی ایم ایف کو خط لکھے، پی ٹی آئی نے ایس سی او اجلاس کےموقع پر بھی احتجاج کی کال دی۔
ان کا کہنا تھا کہ آئینی عدالت کا قیام ملک کے لیے ضروری ہے، ملک پر جب بھی مشکل وقت آیا تو پی پی نے کردار ادا کیا، انشاءاللہ جب اگلا الیکشن ہو گا بلاول بھٹو وزیراعظم ہوں گے۔
فیصل کریم کنڈی نے کہا کہ اگلےالیکشن میں کے پی کے میں جیالا وزیراعلیٰ ہو گا، ہمارے لیڈر آصف زرداری کو 12 سال جیل میں رکھا گیا۔
آئین کی شقیں جو رہ گئی تھیں اس پر بلاول نے قائدانہ کردارادا کیا، آئینی ترمیم کی جب ضرورت پیش آئی وہ پیپلزپارٹی نے کی
ان کا کہنا تھا کہ بہت جلد آئینی عدالتیں بننے جا رہی ہیں، 2013 میں ایک پر امن صوبہ پی ٹی آئی کے حوالے کیا آج دیکھیں بدحالی ہے، دہشت گردی ہے۔
گورنر خیبر پختونخوا فیصل کریم کنڈی نے مزید کہا کہ آج خیبر پختونخوا امن کے لیے پکار رہا ہے۔
