سینئر اداکار مظہر علی خالق حقیقی سے جاملے
پاکستان کے معروف و سینئر اداکار مظہر علی انتقال کرگئے ہیں۔
مظہر علی طویل عرصے سے پھیپڑوں کے مرض میں مبتلا تھے اور گزشتہ کئی سال سے امریکی شہر ہیوسٹن میں رہائش پذیر تھے۔
مرحوم کی فیملی کینیڈا میں مقیم ہے، مرحوم دل کے عارضے کے باعث اسپتال میں زیر علاج تھے۔
اداکار کے لواحقین میں دو بیٹیاں، ایک بیٹا اور اہلیہ شامل ہیں۔
مظہر علی نے پاکستان ٹیلی ویژن پر نشر ہونے والے کئی مقبول ڈراموں میں یادگار کردار ادا کیے، جن میں ’’افشاں‘‘، ’’عروسہ‘‘، ’’شاہین‘‘، ’’کالی دیمک‘‘ اور ’’کانچ کی گڑیا‘‘ شامل ہیں۔
وزیراعلیٰ سندھ مراد علی شاہ نے معروف اداکار مظہر علی کے انتقال پر افسوس کا اظہار کیا۔
انہوں نے کہا کہ مظہر علی کی ٹیلی ویژن کی دنیا میں خدمات کو ہمیشہ یاد رکھا جائے گا، مظہر علی بہترین اداکار تھے، انہوں نے پوری نسل کو انٹرٹین کیا۔
مراد علی شاہ نے اداکار مظہر علی کے لئے بلند درجات کی دعا کی اور لواحقین سے اظہار ہمدردی بھی کیا۔
