انگلش کپتان کی پاکستان کے خلاف پہلے ٹیسٹ میں شرکت مشکوک
انگلش ٹیم کے کپتان بین اسٹوکس کی پاکستان کے خلاف پہلے ٹیسٹ میں شرکت مشکوک ہوگئی۔
پاکستان اور انگلینڈ کی ٹیموں کے درمیان تین ٹیسٹ میچز پر مشتمل سیریز کا آغاز 7 اکتوبر سے ملتان کرکٹ اسٹیڈیم میں ہونے جارہا ہے۔
انجری کے باعث انگلش ٹیم کے کپتان بین اسٹوکس کی پاکستان کے خلاف پہلے ٹیسٹ میں شرکت مشکوک نظر آرہی ہے تاہم ابھی تک انگلینڈ کرکٹ بورڈ نے حتمی اسکواڈ کا اعلان نہیں کیا ہے۔
میڈیا رپورٹس کے مطابق بین اسٹوکس کی غیر موجودگی میں ٹیم کی قیادت اولی پوپ کے سپرد کی جائے گی۔
یاد رہے کہ بین اسٹوکس دی ہنڈریڈ لیگ کے دوران ہیمسٹرنگ انجری کا شکار ہوئے تھے جس کے بعد انہوں نے سری لنکا کے خلاف ٹیسٹ سیریز میں بھی حصہ نہیں لیا تھا۔
تاہم انگلینڈ کرکٹ بورڈ کی جانب سے پاکستان کے خلاف ٹیسٹ سیریز میں ان کی شرکت کی امید ظاہر کی جارہی تھی جب کہ انہیں اسکواڈ کا حصہ بھی بنایا گیا تھا۔
خیال رہے کہ دونوں ٹیموں کے درمیان پہلا ٹیسٹ 7 سے 11 اکتوبر، دوسرا 15 سے 19 اکتوبر جب کہ تیسرا و آخری ٹیسٹ 24 سے 28 اکتوبر کے درمیان کھیلا جائے گا۔
دوسری جانب انگلینڈ کے خلاف پہلے ٹیسٹ کے لیے پاکستان نے اسکواڈ کا اعلان کردیا ہے جس کی کپتانی شاہ مسعود کے سپرد کی گئی ہے۔
قومی اسکواڈ:
شان مسعود (کپتان)، سعود شکیل (نائب کپتان)، محمد رضوان (وکٹ کیپر)، سرفراز احمد (وکٹ کیپر)، عامر جمال، عبداللہ شفیق، بابر اعظم، ابرار احمد، میر حمزہ، محمد ہریرہ، نعمان علی، صائم ایوب، نسیم شاہ، سلمان علی آغا، زاہد محمود اور شاہین آفریدی۔
