جلد ہی ایک منفرد کردار میں نظر آؤں گی، ازیکا ڈینئل
پاکستان کی معروف اداکارہ ازیکا ڈینئل کا کہنا ہے کہ جلد ہی ایک منفرد کردار میں نظر آؤں گی۔
حال ہی میں پاکستان کی معروف اداکارہ ازیکا ڈینئل نے نجی ٹی وی چینل کے شو میں شرکت کی جہاں انہوں نے کیریئر اور نجی زندگی سمیت مختلف موضوعات پر اظہار خیال کیا۔
انہوں نے کہا کہ خواتین کی آزادی اور خودمختاری کی تحریکوں کے باوجود ہراسانی میں کوئی کمی واقعی نہیں ہوئی، کام کی جگہوں پر خواتین کو ہراساں کرنے والے افراد کو یہ سمجھنا چاہیے کہ جو لڑکیاں کام کے لیے گھروں سے نکلتی ہیں ایسا نہیں کہ وہ اپنے رشتے تلاش کرنے نکلی ہیں۔
ازیکا ڈینئل نے کہا کہ شوبز میں آنے سے قبل ایئر ہوسٹس تھی اور فضائی میزبانی کی ملازمت کے دوران ہی ڈراموں میں کام کی پیش کش ہوئی۔
اداکارہ نے کہا کہ ایئر ہوسٹس کی ملازمت کے دوران فضائی سفر کرنے والے بعض افراد مجھے اپنا بزنس کارڈ دیتے تھے جس پر مجھے غصہ آتا تھا لیکن میں خاموش ہوجاتی تھی، کام کے دوران فضائی میزبانوں کو بزنس کارڈز دینا ہراسانی ہے اور میرا خیال ہے ایسے معاملات اب بھی ہوتے ہیں۔
انہوں نے کہا کہ میں نے ایئرہوسٹس کی ملازمت چھوڑ کر 2010 میں ماڈلنگ اور شوبز کیریئر کا آغاز کیا لیکن پہلے منصوبے کے بعد دو سال تک مجھے مزید کام نہیں ملا، اب میں جلد ہی ایک منفرد کردار میں نظر آؤں گی۔
