15 تاریخ کو ایس ای او کی میٹنگ ہے اور ہم اسلام آباد میں تماشا لگا کر بیٹھے ہیں، مفتاح اسماعیل
کراچی: عوام پاکستان پارٹی کے جنرل سیکرٹری مفتاح اسماعیل کا کہنا ہے کہ 15 تاریخ کو ایس ای او کی میٹنگ ہے اور ہم اسلام آباد میں تماشا لگا کر بیٹھے ہیں۔
عوام پاکستان پارٹی کے جنرل سیکرٹری مفتاح اسماعیل نے کراچی میں پریس کانفرنس کرتے ہوئے کہا کہ کراچی میں ایک نشست تھی جس میں کراچی کے مختلف شعبہ جات سے تعلق رکھنے والوں کو جمع کیا گیا تھا۔
انہوں نے کہا کہ نشست میں مختلف بزنس مین اور سابق وزیراعظم شاہد خاقان عباسی یہاں آنا چاہتے تھے لیکن اپنے گھر سے ایئرپورٹ تک نہیں پہنچ سکے، اس وقت حصار میں ہیں اور ملک کا سابق وزیراعظم اپنے گھر سے اسلام آباد ایئر پورٹ نہیں جاسکتا۔
ان کا کہنا تھا کہ اس وقت سیاسی جمود ہے اس کا حل نکالا جائے، علی امین گنڈا پور کو نظر بند کردیا گیا ہے، بہت عجیب بات ہے کہ دو قوتیں دست وگریباں ہیں جب کہ عام آدمی کا مسئلہ مہنگائی اور بجلی کے بل ہیں۔
مفتاح اسماعیل کہتے ہیں کہ 15 تاریخ کو ایس ای او کی میٹنگ ہورہی ہے جس میں روس اور چین سمیت دیگر ممالک شامل ہیں جب کہ ہم اسلام آباد میں تماشا لگا کر بیٹھے ہیں۔ پی ٹی آئی کو حق نہیں دیا جارہا ہے اور وہ پارٹی بھی بصد ہے کہ دنگا فساد و انتشار ہو۔
عوام پاکستان پارٹی کے جنرل سیکرٹری نے کہا کہ دونوں فریقین پاکستان کی خاطر اپنی انا کو چھوڑ دیں، حکومت آئینی ترمیم کو موخر کردے اور پی ٹی آئی پریس گراؤنڈ میں اپنا احتجاج کرے اوع جمہوری روایات کو مقدم رکھیں۔
مفتاح اسماعیل کا کہنا تھا کہ حکومت کالے قوانین پر خوش ہورہی ہے، ملک میں آئین کی کوئی بھی پاسداری نہیں کررہا ہے جب کہ پاکستان کے آئین اور معیشت کے ساتھ مذاق کیا جارہا ہے۔ ملک کے فیصلے ملک کی سڑکوں پر ہوں گے تو ملک کے لیے بہتر نہیں ہوگا۔
انہوں نے مزید کہا کہ ایک گروپ بنائیں سب کے پاس جائیں اور ملک کے مسائل کا حل نکالا جائے، جس ملک میں دو دن سے موبائل فونز بند ہوں گے تو سرمایہ کاری کیسے آئے گی، سیادی انتشار کے باعث ملک میں سرمایہ کاری کیسے ہوسکتی ہے۔
