حزب اللہ کا اسرائیلی ٹینک کو نشانہ بنانے کا دعویٰ
حزب اللہ نے مارون جنگل کے علاقے میں اسرائیلی ٹینک کو نشانہ بنانے کا دعویٰ کردیا۔
غیر ملکی خبر رساں ادارے کی رپورٹ کے مطابق حزب اللہ کی جانب سے جاری کردہ بیان میں کہا گیا ہے کہ مارون جنگل کے علاقے میں پیش قدمی کرتے ہوئے ہمارے جنگجوؤں نے اسرائیلی ٹینک کو نشانہ بنایا۔
حزب اللہ نے اس حملے کے نتیجے میں کئی فوجیوں کو ہلاک کرنے کا بھی دعویٰ کیا ہے جب کہ حزب اللہ آج تک اسرائیلی افواج پر 7 حملے کرچکا ہے۔
علاوہ ازیں حزب اللہ نے لبنان کی سرحد کے 45 کلو میٹر قریب شمالی شہر حیفہ میں واقع رامات فوجی اڈے کو فادی 1 میزائل سے نشانہ بنایا۔
حزب اللہ نے غیر ملکی خبر رساں ادارے کو یہ بھی بتایا کہ جنگجوؤں کی جانب سے سرحد کے قریب اسرائیلی فوجیوں کو متعدد راکٹ فائر سے بھی نشانہ بنایا گیا ہے۔
دوسری جانب جنوبی لبنان میں صیہونی فوج نے ایک اسپتال سمیت مسجد کو نشانہ بنایا جس میں اسپتال کے ڈائریکٹر بال بال بچ گئے۔
اسپتال حکام کے مطابق اسرائیل کی جانب سے عمارت کو خالی کرنے کی دھمکی دی گئی تھی جب کہ اس حملے میں طبی اور نرسنگ عملے کے 9 افراد شدید زخمی ہوگئے ہیں جن میں سے بیشتر کی حالت تشویش ناک بتائی جارہی ہے۔
اس حوالے سے اسرائیلی فوج نے دعویٰ کیا تھا کہ جب مسجد کو نشانہ بنایا گیا تو اس وقت حزب اللہ کے جنگجو موجود تھے تاہم اس حوالے سے کوئی ثبوت فراہم نہیں کیے گئے ہیں۔
