تحریک انصاف کے بھیس میں تحریک انتشار کا واحد مقصد ملک میں آگ لگانا ہے، مریم نواز
لاہور: وزیر اعلیٰ پنجاب مریم نواز کا کہنا ہے کہ تحریک انصاف کے بھیس میں تحریک انتشار کا واحد مقصد ملک میں آگ لگانا ہے۔
وزیر اعلیٰ پنجاب مریم نواز شریف سماجی رابطے کی سائٹ ایکس پا جاری بیان میں کہا کہ تحریک انصاف کے بھیس میں تحریک انتشار کا واحد مقصد ملک میں آگ لگانا ہے۔
مریم نواز کا کہنا ہے کہ یہ کسی رعایت یا نرمی کے مستحق نہیں، ان کے لشکر میں فرنٹ لائنز میں تربیت یافتہ دہشت گرد شامل ہیں جن کو انھوں نے پولیس اور ریاست پر حملہ آور ہونے کے لیے استعمال کیا ہے۔ کون سا ملک یہ برداشت کرتا ہے؟
دوسری جانب وزیر اطلاعات پنجاب عظمیٰ بخاری نے زخمی کانسٹیبل کی تفصیلات ایکس پر شیئر کرتے ہوئے لکھا کہ پی ٹی آئی وکلاء کے پتھراؤ سے ایک پولیس ملازم شدید زخمی ہوا ہے۔
ان کا کہنا تھا کہ کسنٹیبل بلال، سرکاری گاڑی پر لاء اینڈ آرڈر ڈیوٹی کے لیے پی ایم جی چوک پر موجود تھا، جہاں پی ٹی آئی کے وکلاء نے احتجاج کے دوران پولیس پر پتھراو کیا۔
انہوں نے بتایا کہ پتھراؤ کے نتیجے میں کانسٹیبل بلال کے چہرے پر پتھر لگا ہے جس سے بلال کی آنکھ کے پاس شدید گہرا کٹ لگا ہے جب کہ بلال کو علاج کے لیے شفٹ کیا جارہا ہے۔
