بالی ووڈ فلم انڈسٹری کی مشہور و معروف اداکارہ زرین خان نے کہا ہے کہ امید ہے کہ اگلے سال آپ مجھے فلموں میں ضرور دیکھیں گے۔
حال ہی میں معروف اداکارہ زرین خان نے سوشل میڈیا کی فوٹو اینڈ شیئرنگ ایپ انسٹاگرام پر سوال و جواب کا سیشن منعقد کیا جہاں ایک صارف نے ان سے کہا کہ آپ کو مزید فلمیں کرنی چاہئیں، ہم انتظار کر رہے ہیں۔
جواب میں اداکارہ نے لکھا کہ ہاں! وقفہ کچھ طویل ہو گیا تھا، امید ہے کہ اگلے سال آپ مجھے فلموں میں ضرور دیکھیں گے، اگلے سال آپ مجھے اسکرین پر ضرور دیکھ سکیں گے۔
سیشن کے دوران ایک صارف نے ان سے پوچھا کہ وہ کس طرح کی فلموں میں کام کرنا پسند کریں گی؟ تو زرین خان کا کہنا تھا کہ مجھے لگتا ہے کہ میں کوئی مکمل مزاحیہ یا ایکشن فلم کرنا چاہوں گی۔
اس بات سے ظاہر ہوتا ہے کہ زرین کی اگلی فلم یا تو کامیڈی ہو گی یا پھر ایک ایکشن فلم جس سے تھیٹر میں ان کی واپسی شائقین کے لیے ایک شاندار تجربہ ثابت ہو گی۔
زرین خان کافی عرصے سے بڑے پردے سے غائب تھیں جس کی وجہ سے ان کے مداح ان کی واپسی کا بے صبری سے انتظار کر رہے تھے۔
