کسی اداکار خاندان سے تعلق نہیں اس لیے شوبز میں ابھی تک مشکلات کا سامنا کررہا ہوں، فہد شیخ
پاکستان شوبز انڈسٹری کے معروف اداکار فہد شیخ نے کہا ہے کہ میرا کسی اداکار خاندان سے تعلق نہیں اس لیے میں شوبز میں ابھی تک مشکلات کا سامنا کررہا ہوں۔
حال ہی میں اپنے دیے گئے ایک انٹرویو میں معروف اداکار فہد شیخ نے بتایا کہ ان کا تعلق کسی اداکار خاندان سے نہیں، اس لیے انہیں مشکلات پیش آئیں اور تاحال بھی وہ مشکلات کا سامنا کرتے ہیں۔
انہوں نے کہا کہ ان کے ساتھ تفریق کی جاتی ہے، ڈرامے میں مرکزی کردار ان کا ہوتا ہے لیکن ڈرامے کے پوسٹر پر ان کی تصویر نہیں ہوتی۔
ان کا کہنا تھا کہ بعض مرتبہ ایسا بھی ہوا کہ ان پر ہی گانا فلمایا گیا لیکن وہ ہی گانے میں نظر نہیں آئے جبکہ جان بوجھ کر ان کے مناظر خراب کیے جاتے رہے ہیں۔
ایک سوال کے جواب میں فہد شیخ نے کہا کہ انڈسٹری میں متعدد اداکار و اداکارائیں مغرور ہیں، کسی بھی مرکزی اداکار یا اداکارہ کو یہ سمجھنا چاہیے کہ ڈرامے میں ان کے ساتھ کام کرنے والے معاون اداکار یا ڈرامے کی ٹیم کا دوسرا عملہ بھی عزت کے لائق ہے، انہیں کم تر نہ سمجھا جائے، انہیں کیڑے مکوڑے سمجھ کر ان سے دوری اختیار نہ کی جائے۔
اداکار کا کہنا تھا کہ پیسہ اور شہرت آتے ہی لوگوں کے رویے تبدیل ہوجاتے ہیں، حالانکہ جس کے پاس زیادہ پیشہ اور شہرت ہو، اسے مزید اچھا انسان بن جانا چاہیے، وہ دوسروں کی عزت زیادہ کرے۔
انہوں نے کہا کہ ان پر شوبز انڈسٹری میں متعدد بار بلاجواز پابندی لگائی جا چکی ہے، انہیں کاسٹ کرنا بند کردیا جاتا ہے لیکن پھر انہیں خود ہی کاسٹ کرنا شروع کردیا جاتا ہے۔
ان کا مزید کہنا تھا کہ بعد ازاں ان سے خود ہی پابندی ہٹا کر انہیں کاسٹ کرلیا جاتا ہے، پھر ان کا ڈراما مقبول ہوتا لیکن پھر اچانک ان پر پابندی لگا دی جاتی ہے اور انہیں خود پر پابندی لگانے کی کوئی وجہ یا سبب بھی نہیں بتایا جاتا۔
