ملتان میں پاک انگلینڈ ٹیسٹ سیریز کے لئے انتظامات مکمل
ملتان: ضلعی انتظامیہ نے پاک انگلینڈ ٹیسٹ سیریز کے لئے انتظامات مکمل کرلیے۔
ملتان میں ضلعی انتظامیہ نے پاک انگلینڈ ٹیسٹ سیریز میں کرکٹ شائقین کے لئے اسٹیڈیم اور روٹس کی سجاوٹ مکمل کرنے سمیت صفائی کے پھرپور انتظامات کرلیے ہیں۔
ڈپٹی کمشنر وسیم حامد سندھو نے کرکٹ اسٹیڈیم، ہوٹل اور روٹس کی تفصیلی انسپکشن کی جب کہ انہیں ایڈیشنل ڈپٹی کمشنر جنرل محمد سیف اور ضلعی و پولیس حکام نے تفصیلی بریفننگ بھی دی۔
ڈپٹی کمشنر وسیم حامد سندھو کا کہنا ہے کہ پاک انگلینڈ ٹیسٹ ٹیموں کے مجوزہ قیام و سیکیورٹی پلان کو حتمی شکل دے دی گئی ہے، رومینزہ ہوٹل ڈی ایچ اے سے ملتان کرکٹ اسٹیڈیم کا روٹ براستہ متی تل، ناردن بائی پاس، وہاڑی روڈ سے ملتان کرکٹ اسٹیڈیم پوگا۔
ڈپٹی کمشنر کا کہنا تھا کہ کرکٹ اسٹیڈیم اور روٹس پر خصوصی صفائی و انتظامات کئے جائیں گے، ضلعی محکمے کرکٹ میلے کو کامیاب بنانے کے لئے فوری اقدامات کریں۔
دوسری جانب پاکستان بمقابلہ انگلینڈ ٹیسٹ سریز کے لیے ملتان پولیس نے سیکیورٹی پلان جاری کردیا ہے۔
ترجمان ملتان پولیس کا کہنا ہے کہ 5 ہزار سے زائد پولیس اہلکار و افسران ڈیوٹیاں سرانجام دیں گے، ٹیسٹ سیریز کا آغاز 7 اکتوبر سے ملتان کرکٹ اسٹیڈیم میں ہوگا جب کہ پہلے 2 ٹیسٹ میچز ملتان کرکٹ اسٹیڈیم میں کھیلے جائیں گے۔
ترجمان نے بتایا کہ سی پی او صادق علی ڈوگر سیکیورٹی انتظامات کی نگرانی خود کریں گے، پولیس کے ساتھ ساتھ پاک فوج اور رینجرز مختلف مقامات پر ڈیوٹی سرانجام دیں گے۔
ترجمان کا مزید کہنا تھا کہ کرکٹ شائقین کے لیے فاطمہ جناح ٹاؤن میں گاڑیوں کی پارکنگ کی جائے گی، شائقین کو پارکنگ پوائنٹ سے اسٹیڈیم تک خصوصی شٹل بس سروس کے ذریعے پہنچایا جائے گا۔
