جلسے میں کوئی رکاوٹ کھڑی نہیں کی، لوگوں نے پی ٹی آئی کو مسترد کردیا؛ عطاء تارڑ
لاہور: وفاقی وزیر اطلاعات عطاء تارڑ کا کہنا ہے کہ جلسے میں کوئی رکاوٹ کھڑی نہیں کی گئی تھی جب کہ لوگوں نے پی ٹی آئی کو مسترد کردیا ہے۔
وفاقی وزیر اطلاعات عطاء تارڑ نے کہا کہ پنجاب بڑا مہمان نواز ہے، آج سڑکیں بھی کھلی رکھیں اور سیکیورٹی بھی دی گئی۔ پی ٹی آئی کو جلسے کے لیے فری ہینڈ دیا گیا لیکن لوگ نہیں آئے۔
انہوں نے کہا کہ پی ٹی آئی چاہتی ہے ملک ترقی نہ کرے، پی ٹی آئی نے آئی ایم ایف کو خطوط لکھے جب کہ جلسے کا مقصد بانی پی ٹی آئی کے لیے این آر او ہے لیکن این آر او نہیں ملے گا مقدمات کا سامنا کرنا پڑے گا۔
عطاء تارڑ نے کہا کہ مہنگائی میں کمی کی وجہ سے لوگوں نے پی ٹی آئی کو مسترد کردیا، پورا زور لگا کر بھی پی ٹی آئی پورے ملک سے چند لوگ اکٹھے نہیں کرسکی۔
ان کا کہنا تھا کہ لاہور جلسے کے لیے ہوشیارخبردار کے نعرے لگائے گئے، پی ٹی آئی جلسے میں کوئی رکاوٹ کھڑی نہیں کی گئی۔
وفاقی وزیر اطلاعات مزید کہتے ہیں کہ لاہور جلسے سے متعلق بڑی بڑی باتیں کی گئیں، لاہور کی ہر سڑک کھلی ہے لیکن پی ٹی آئی کا جلسہ ناکام ہوگیا اور عوام نے مسترد کردیا۔
