پاک انگلینڈ سیریز یو اے ای یا سری لنکا منتقل ہونے کا امکان
پاکستان کی انگلینڈ کے خلاف ہوم سیریز یو اے ای یا سری لنکا منتقل ہونے کا امکان ہے۔
پاکستان کرکٹ بورڈ(پی سی بی) کے ذرائع کے مطابق ملکی میدان مکمل تیار نہ ہونے کی وجہ سے پاک انگلینڈ کرکٹ سیریز کے یو اے ای یا سری لنکا منتقلی کا امکان بڑھ گیا ہے۔
پاکستان اور انگلینڈ کے درمیان پہلا ٹیسٹ 7 سے 11 اکتوبر تک ملتان، دوسرا ٹیسٹ 15 سے 19 اکتوبر تک کراچی جبکہ تیسرا ٹیسٹ 24 سے 28 اکتوبر تک راولپنڈی میں شیڈول ہے۔
لاہور اور کراچی کی طرح راولپنڈی اسٹیڈیم میں بھی تعمیراتی کام ہو گا۔سیریز کے لیے اگر کام روکا گیا تو چیمپئنز ٹرافی سے قبل اسٹیڈیمز کی تیاری مزید چیلنجنگ بن جائے گی۔
ذرائع کا کہنا ہے کہ انگلینڈ سے شائقین کے مخصوص گروپ ’برمی آرمی‘ کے بھی پاکستان آنے کی توقع ہے اس وجہ سے کراؤڈ کے بغیر میچز کرانا بھی ممکن نہ ہو گا۔
ذرائع کا مزید کہنا ہے کہ ان چیلنجز کو دیکھتے ہوئے پی سی بی متبادل آپشنز پر غور کرنے پر مجبور ہو گیا ہے۔یو اے ای پہلا انتخاب ہوگا مگر دبئی اور شارجہ میں 3 سے 20 اکتوبر تک آئی سی سی ویمنز کرکٹ ورلڈکپ کے میچز ہونے ہیں۔
پاک انگلینڈ سیریز تقریباً ان ہی تاریخوں میں شیڈول ہے۔ایسے میں یو اے ای کا صرف ایک وینیو ابوظہبی ہی دستیاب ہوگا۔
ذرائع کا کہنا ہے کہ پی سی بی حکام سری لنکا میں بھی میچز کرانے پر غور کر رہے ہیں۔ اس حوالے سے انگلش کرکٹ بورڈ کی مشاورت سے آئندہ چند روز میں کوئی فیصلہ ہوگا۔
