عسکری قیادت کا پاکستان کی خود مختاری اور علاقائی سلامتی کا ہر قیمت پر تحفظ کرنے کا عزم
راولپنڈی: پاکستان کی عسکری قیادت نے ملک کی خود مختاری اور علاقائی سلامتی کا ہر قیمت پر تحفظ کرنے کے عزم کا اظہار کیا ہے۔
پاک فوج کے شعبہ تعلقات عامہ (آئی ایس پی آر) کے مطابق وزیراعظم شہباز شریف نے آرمی وار گیم کی اختتامی تقریب میں شرکت کی جو راولپنڈی میں منعقد ہوئی۔
وزیراعظم شہباز شریف کو حال ہی میں مکمل ہونے والی وارگیم اور ہر طرح کے خطرات سے نمٹنے کے لئے پاک فوج کی آپریشنل تیاریوں سے آگاہ کیا گیا۔
آئی ایس پی آر نے بتایا کہ وزیر دفاع، وزیر خزانہ، وزیر اطلاعات اور چیف آف آرمی اسٹاف سمیت اعلیٰ فوجی حکام بھی تقریب میں موجود تھے۔
وزیراعظم شہباز شریف نے پاک فوج کی آپریشنل تیاریوں پر مکمل اظہار اطمینان کیا اور وزیراعظم نے خطے میں امن اور استحکام کے لیے پاک فوج کے کلیدی کردار کو سراہا۔
وزیراعظم شہباز شریف نے ایٹمی جنوبی ایشیاء میں طاقت کے توازن کو برقرار رکھنے کے حوالے سے پاک فوج کے کردار کی تعریف کی۔
وزیراعظم شہباز شریف نے دشمن کی مہم جوئی کو ناکام بنانے اور ڈیٹرنس کو تقویت دینے کے لیے اختراعی تصورات اور ڈھانچہ جاتی اصلاحات کو بھی سراہا۔
عسکری قیادت نے پاکستان کی خود مختاری اور علاقائی سلامتی کا ہر قیمت پر تحفظ کرنے کے عزم کا اظہار کرتے ہوئے کہا کہ پاک فوج موجودہ سیکیورٹی چیلنجز سے بخوبی آگاہ ہے۔
آئی ایس پی آر نے مزید کہا کہ پاک فوج پاکستان کے خلاف جارحانہ عزائم کو ناکام بنانے کے لیے اپنی صلاحیتوں میں اضافہ جاری رکھے گی۔
