ویسٹ انڈیز نے پہلے ٹی ٹوئنٹی میں جنوبی افریقہ کو شکست دے دی
ویسٹ انڈیز نے جنوبی افریقہ کو پہلے ٹی ٹوئنٹی میچ میں 7 وکٹوں سے شکست دے دی۔
تفصیلات کے مطابق ٹاروبا میں برائن لارا اسٹیڈیم میں کھیلے گئے تین ٹی ٹوئنٹی میچز کی سیریز کے پہلے میچ میں ویسٹ انڈیز نے 175 رنز کا ہدف 18 ویں اوور میں 3 وکٹوں کے نقصان پر حاصل کرلیا۔
ویسٹ انڈیز کی جانب سے نکولس پورن 65 رنز کی برق رفتار اننگز کھیل کر ناقابل شکست رہے۔شائے ہوپ 51 اور ایلک اتھانازے 40 رنز بنا کر نمایاں رہے۔
جنوبی افریقہ کی جانب سے بارٹمین نے 2 اور کوینا مفاکا نے ایک وکٹ حاصل کی۔
اس سےقبل ویسٹ انڈیز نے ٹاس جیت کر جنوبی افریقہ کو پہلے بیٹنگ کرنے کی دعوت دی تھی۔ جنوبی افریقہ نے مقررہ 20 اوورز میں 7 وکٹوں کے نقصان پر 174 رنز بنائے تھے۔
جنوبی افریقہ کی جانب سے ٹرسٹان اسٹبز 76 اور پیٹرک کروگر 44 رنز بنا کر نمایاں رہے تھے۔
ویسٹ انڈیز کی جانب سے میتھیو فورڈ ے نے 3، شمار جوزف نے 2 جبکہ عقیل حسین اور روماریو شیفرڈ نے ایک ایک وکٹ حاصل کی تھی۔
