پیرس اولمپکس: فٹبال کے پہلے میچ میں ہی ہنگامہ آرائی
پیرس اولمپکس میں کھیلا جانے والا فٹبال کے پہلے میچ میں ہی ہنگامہ آرائی ہوگئی۔
بین الاقوامی خبررساں ادارے کے مطابق 33 ویں پیرس اولمپک گیمز 2024 کا باقاعدہ آغاز تو جمعے سے ہوگا لیکن چند کھیلوں کے مقابلے بدھ سے شروع ہوگئے ہیں۔
اولمپک گیمز کا آغاز مردوں کے فٹبال ٹورنامنٹ سے ہوا جس کے پہلے میچ میں ہی ہنگامہ آرائی ہوگئی۔
گروپ بی کے میچ میں حیرت انگیز طور پر مراکش نے ارجنٹائن کی مضبوط ٹیم کو 1-2 سے شکست دے کر تہلکہ مچادیا۔ تاہم اس میچ کو مکمل ہونے میں 4 گھنٹے لگے۔
دوران میچ انجری ٹائم کے 16 ویں منٹ میں مقابلہ 2-2 سے برابر ہونے کے بعد تماشائیوں نے ہنگامہ برپا کردیا۔
بعد ازاں وی اے آر کے فیصلہ سے قبل کھلاڑیوں کو میدان سے باہر لے جایا گیا اور پھر اسٹینڈز کو تماشائیوں سے خالی کرالیا گیا۔
آخری 3 منٹ کا میچ تماشائیوں کے بغیر مکمل ہوا، میچ جیتنے کے بعد فاتح ٹیم خالی گراؤنڈ میں بھرپور جشن مناتی نظر آئی۔