چیمپئنز ٹرافی 2025: افغان ٹیم پاکستان آئے گی یا نہیں، بورڈ نے فیصلہ سنادیا
افغانستان کرکٹ بورڈ (اے سی بی) نے چیمپئنز ٹرافی 2025 میں اپنی شرکت سے متعلق پاکستان کو آگاہ کردیا۔
تفصیلات کے مطابق سری لنکا کے دارالحکومت کولمبو میں جاری انٹرنیشنل کرکٹ کونسل (آئی سی سی) کے سالانہ اجلاس میں افغانستان کرکٹ بورڈ کے چیئرمین واعظ اشرف اور نصیب خان نے چیئرمین پی سی بی محسن نقوی سے ملاقات کی۔
میٹنگ کے دوران افغان بورڈ کے اعلیٰ حکام نےپاکستان میں شیڈول چیمپئنز ٹرافی 2025 میں اپنی ٹیم کی شرکت کی یقین دہانی کروائی۔
افغان کرکٹ بورڈ کے حکام نے سوشل میڈیا پر چلنے والی افواہوں کو مسترد کرتے ہوئے کہا کہ ہماری ٹیم پاکستان کی میزبانی میں ہونے والی چیمپئنز ٹرافی 2025 کے لیے میزبان ملک جائے گی۔
واضح رہے کہ سوشل میڈیا پر غیر مصدقہ اکاؤنٹس کے ذریعے یہ من گھڑت خبریں پھیلائی جارہیں تھی کہ بھارت کی طرح افغان ٹیم بھی سیکیورٹی خدشات کا بہانہ بناکر پاکستان کا رخ نہیں کرے گی۔
