ٹی ٹوئنٹی ورلڈکپ 2026 میں کوالیفائی کرنے والی ٹیمیں سامنے آگئیں
آئی سی سی نے ٹی ٹوئنٹی ورلڈکپ 2026 کے لئے کوالیفائی کرنے والی ٹیموں کی تصدیق کردی۔
انٹرنیشنل کرکٹ کونسل کی جانب سے ٹی ٹوئنٹی ورلڈکپ 2026 کے لئے کوالیفائی کرنے والی ٹیموں کے نام سامنے آگئے ہیں جس میں پاکستان کرکٹ ٹیم بھی شامل ہے۔
پاکستان نے ٹی ٹوئنٹی میں بہتر رینکنگ کی بنیاد پر ورلڈکپ 2026 کے لئے براہ راست کوالیفائی کیا ہے، پاکستان رواں برس ہونے والے ٹی ٹونٹی ورلڈ کپ کے سپر ایٹ مرحلے میں نہیں پہنچ سکا تھا۔
ٹی ٹوئنٹی ورلڈکپ 2026 کے لئے ٹوٹل 12 ٹیموں نے براہ راست کوالیفائی کیا ہے، ورلڈکپ 2026 میں میزبان سری لنکا اور بھارت کے علاوہ افغانستان نے بھی کوالیفائی کیا ہے۔
علاوہ ازیں آسٹریلیا، جنوبی افریقہ، بنگلادیش، انگلینڈ، ویسٹ انڈیز، امریکہ، آئرلینڈ اور نیوزی لینڈ بھی شامل ہیں، ٹی ٹوئنٹی ورلڈکپ 2026 میں ٹوٹل 20 ٹیمیں ایکشن میں ہوں گی۔
باقی 8 ٹیموں کا انتخاب گزشتہ ٹی ٹونٹی ورلڈکپ کی طرح ریجنل کوالیفائر کے ذریعے ہوگا، ٹی ٹوئنٹی ورلڈکپ 2026 حال ہی میں ختم ہونے والے ٹی ٹونٹی ورلڈکپ کے فارمیٹ پر ہی کھیلا جائے گا۔
ٹی ٹوئنٹی ورلڈکپ 2026 میں بھی 20 ٹیموں کو 4 گروپس میں رکھا جائےگا، بہترین 8 ٹیمیں سپر ایٹ مرحلے کے لیے کوالیفائی کریں گی۔
