فائنل میں سوریا کمار یادیو کے شاندار کیچ نے نیا تنازع کھڑا کردیا
ٹی ٹوئنٹی ورلڈکپ کے فائنل میں سوریا کماریادیو کے ناقابل یقین کیچ نے نیا تنازع کھڑا کردیا ہے۔
بھارت اور جنوبی افریقہ کی ٹیموں کے درمیان ٹی ٹوئنٹی ورلڈکپ کا فائنل ہفتہ کو بارباڈوس میں کھیلا گیا جس میں سنسنی خیز مقابلے کے بعد بھارت نے 7 رنز سے جیت اپنے نام کی۔
میچ میں اہم موڑ اس وقت آیا جب آخری اوور میں جنوبی افریقی بیٹر ڈیوڈ ملر 21 رنز بناکر پانڈیا کی گیند پر باؤنڈر لائن پر کیچ آؤٹ ہوئے جس کے بعد بھارت کی جیت کے امکانات مزید بڑھ گئے۔
ڈیوڈ ملر کا ناقابل یقین کیچ سوریا کمار یادیو نے بڑی ہی مہارت سے باؤنڈری لائن پر لیا تاہم اس کیچ نے ایک نئے تنازع کو جنم دے دیا ہے۔
سوشل میڈیا پر کئی صارفین کا دعویٰ ہے کہ سوریا کمار یادیو کا کیچ لیتے وقت پاؤں باؤنڈری لائن کو چھوگیا تھا جب کہ کچھ صارفین یہ بھی کہتے ہیں کہ باؤنڈری کی رسیاں بھی اپنی پوزیشن سے باہر تھیں۔
خیال رہے کہ آئی سی سی کے قوانین کے مطابق بھی ’’اگر کوئی ٹھوس چیز جو حدود کو نشان زد کرنے کے لیے استعمال ہو اور کسی وجہ سے اس میں خلل آجائے تو اسے اس کی اصلی حالت میں ہی سمجھا جائے گا‘‘۔
آئی سی سی کے قوانین کو دیکھتے ہوئے باؤنڈری کی رسی کو اس کی اصلی حالت میں ہی لانا چاہیے تھا تاہم میچ کے دوران ہمیں ایسا دیکھنے کو نہیں ملا۔