ناقابل شکست عثمان وزیر نے 13 ویں انٹرنیشل فائٹ جیت لی
بنکاک: پاکستان کے انٹرنیشنل باکسر عثمان وزیر نے اپنی 13 ویں انٹرنیشل فائٹ جیت لی۔
تھائی لینڈ میں کھیلی گئی فائٹ میں اس بار عثمان وزیر کا مقابلہ تھائی حریف سے تھا جس میں انہوں نے اپنے حریف کو تیسرے راؤنڈ میں ناک آؤٹ کردیا۔
عثمان وزیر اپنی تمام 13 انٹرنیشنل فائٹس جیت کر اب تک ناقابل شکست ہیں جب کہ وہ ورلڈ یوتھ ٹائٹل، ایشین ٹائٹل اور مڈل ایسٹ ٹائٹل جیت چکے ہیں۔
اس موقع پر عثمان وزیر کا کہنا ہے کہ ایشین ٹائٹل، مڈل ایسٹ اور ورلڈ یوتھ ٹائٹل بھی جیت کر پاکستان اور گلگت بلتستان کا نام روشن کیا۔
انہوں نے کہا کہ آج تک کوئی پاکستانی باکسر یہ ٹائٹل نہیں جیت سکا ہے، مجھے 13 ویں فائٹ میں اپنے ورلڈ یوتھ ٹائٹل کا دفاع کرنا تھا۔
عثمان وزیر کا کہنا تھا کہ فنڈز کی عدم دستیابی کی وجہ سے میں ٹائٹل فائٹ کی فیس جمع نہیں کرواسکا، فائٹ جیتنے کی خوشی ہے لیکن وعدہ کے باوجود حکومت کی سپورٹ نہ ملنے کا افسوس بھی ہے۔
عثمان وزیر مزید کہتے ہیں کہ حکومتی سپورٹ نا ملنے کی وجہ سے میرا ورلڈ یوتھ ٹائٹل بغیر لڑے واپس لے لیا گیا، نو سال کی مسلسل محنت اور اپنی مدد آپ کے تحت یہ ٹائٹل پاکستان کے لیے جیتا تھا۔
