پی ایس ایل کے دسویں ایڈیشن کا مجوزہ شیڈول منظر عام پر آگیا
پاکستان سپر لیگ (پی ایس ایل) کے دسویں ایڈیشن کا مجوزہ شیڈول منظر عام پر آگیا۔
تفصيلات کے مطابق پاکستان کرکٹ بورڈ (پی سی بی) نے پی ایس ایل کے دسویں ایڈیشن کا مجوزہ شیڈول فرنچائزز کو ارسال کردیا ہے جس کے مطابق 12 اپریل سے ایونٹ کے آغاز کا امکان ہے۔
مجوزہ شیڈول کے مطابق ایونٹ کے سب سے زیادہ 10 میچز کی میزبانی لاہور کے قذافی اسٹیڈیم کو دی گئی ہے۔ اس کے بعد پنڈی کرکٹ گراؤنڈ میں 8 میچز جبکہ نیشنل اسٹیڈیم کراچی اور ملتان اسٹیڈیم میں 5،5 میچز کھیلے جائیں گے۔
ایونٹ کے پلے آف اور فائنل سمیت تمام 4 میچز نیوٹرل وینیو پر ہوں گے۔
ٹیمیں 7 اپریل 2025 کو رپورٹ کریں گی اور 11 اپریل تک پریکٹس سیشنز کا سلسلہ جاری رہے گا۔
افتتاحی میچ ہفتہ 12 اپریل کو دفاعی چیمپئن اسلام آباد یونائیٹڈ اور لاہور قلندرز کے درمیان راولپنڈی میں کھیلا جائے گا۔
گروپ میچز مکمل ہونے کے بعد 11 سے 14 مئی تک کوئی میچ نہیں ہوگا۔
اس کے بعد نیوٹرل وینیو پر 15 مئی کو کوالیفائر ون ، 16 مئی کو الیمنیٹر، 18 مئی کو کوالیفائر 2 جبکہ 20 مئی کو فائنل کھیلا جائےگا۔
پی سی بی کی جانب سے نیوٹرل وینیو کا نام مجوزہ شیڈول میں درج نہیں کیا گیا لیکن ممکنہ طور پر یہ انگلینڈ ہوسکتا ہے۔
واضح رہے کہ یہ ابتدائی شیڈول ہے، فرنچائزز جائزہ لے کر پی سی بی سے رابطہ کریں گی اور اس میں تبدیلیاں بھی ممکن ہیں۔