اسٹیٹ بینک پالیسی ریٹ میں 5 فیصد کمی کرے، عاطف اکرام شیخ
صدر ایف پی سی سی آئی عاطف اکرام شیخ نے کہا کہ شرح سود کو سنگل ڈیجیٹ میں لانے کا سنہری موقع ہے، اسٹیٹ بینک پالیسی ریٹ میں 5 فیصد کمی کرے۔
صدر ایف پی سی سی آئی عاطف اکرام شیخ نے شرح سود میں کمی کے حوالے سے اپنے ایک اہم بیان میں کہا کہ پہلی ششماہی میں چار بار 27 جنوری، 10 مارچ، 5 مئی اور 16 جون کومانیٹری پالیسی کمیٹی کے اجلاس ہوں گے۔
عاطف اکرام شیخ نے کہا کہ شرح سود میں فوری اور بڑی کمی ملکی معیشت کی بہتری اور مالی استحکام کے حوالے سے اہم ہے، مہنگائی 4.1 فیصد تک گر گئی، ترسیلات زر میں سالانہ بنیادوں پر 29 فیصد اضافہ ریکارڈ ہوا ہے۔
ان کا یہ بھی کہنا تھا کہ اسٹاک مارکیٹ 1 لاکھ 13ہزار پوائنٹس پر، جبکہ سرکاری زرمبادلہ ذخائر 12.5 ارب ڈالر ہو گئے ہیں، مہنگائی میں کمی کے باوجود 13فیصد کی بلند شرح سود کاروباری سرگرمیوں کے فروغ میں بڑی رکاوٹ ہے۔
عاطف اکرام شیخ نے کہا کہ مہنگائی میں نمایاں کمی کے پیش نظر پالیسی ریٹ کی موجودہ دوہرے ہندسے کی شرح غیر منصفانہ ہے، دسمبر میں مہنگائی کی شرح 4.1 فیصد ہونے پر پالیسی ریٹ میں 500 بیسس پوائنٹس کی کمی ہونی چاہئے۔
انہوں نے کہا کہ شرح سود میں بڑی کمی برآمدات میں مزید اضافے اور نئی سرمایہ کاری کی حوصلہ افزائی کرے گی، ملکی معیشت ٹریک پر آچکی، پائیدار اور دیرپا معاشی استحکام کے لیے کاروبار دوست اقدامات ناگزیر ہیں۔
عاطف اکرام شیخ نے مزید یہ بھی کہا کہ بزنس کمیونٹی معاشی بہتری کے لیے کیے گئے تمام حکومتی فیصلوں کی مکمل حمایت کرے گی۔
