وزیراعظم سے مسلم ورلڈ لیگ کے سیکرٹری جنرل کی ملاقات
وزیراعظم شہباز شریف سے مسلم ورلڈ لیگ کے سیکرٹری جنرل ڈاکٹر محمد بن عبدالکریم العیسیٰ کی ملاقات ہوئی ہے۔
وزیراعظم نے پاکستان آمد پر سیکرٹری جنرل کا خیر مقدم کیا۔
انہوں نے اسلام آباد میں مسلم ممالک میں لڑکیوں کی تعلیم پر کانفرنس کی مشترکہ میزبانی میں مسلم ورلڈ لیگ کی حمایت کو سراہا۔
دونوں رہنماؤں نے اس اشتراک کی پائیداری اور افادیت کو اجاگر کیا۔
ملاقات میں اتفاق ہوا کہ کانفرنس کے انعقاد سے عالمی سطح پر اہم پیغام جائے گا کہ مسلم دنیا لڑکیوں کی تعلیم کو فروغ دینے کیلئے پر عزم ہے۔
وزیراعظم نے اسلام کے حقیقی تشخص کو فروغ دینے، مسلم دنیا کے مشترکہ مقاصد کی وکالت پر تنظیم کے تعاون کو سراہا۔
شہباز شریف نے مسلم ورلڈ لیگ کے مقاصد اور اہداف کے لیے پاکستان کی حمایت کا اعادہ کیا۔
انہوں نے سیکرٹری جنرل کا پاکستان میں سیرت میوزیم کے قیام کے فیصلے پر شکریہ ادا کیا۔
ان کا کہنا تھا کہ امید ہے مسلم دنیا کا یہ اہم منصوبہ جلد پائہ تکمیل کو پہنچے گا، پاکستان مشترکہ منصوبوں کی جلد تکمیل بالخصوص سیرت میوزیم کے قیام کے لیے کام جاری رکھے گا۔
سیکرٹری جنرل نے کانفرنس کے شاندار انتظامات اور مسلم ورلڈ لیگ کے ساتھ تعاون پر پاکستان کا شکریہ ادا کیا۔
کے سیکرٹری جنرل ڈاکٹر محمد بن عبدالکریم العیسیٰ نے پاکستان اور امت مسلمہ کے درمیان تعلقات کو مزید مستحکم کرتے ہوئے مسلم دنیا کے مقاصد کو آگے بڑھانے کے لیے پاکستان کے عزم اور کوششوں کی تعریف کی۔
ان کا کہنا تھا کہ کانفرنس کے اختتام پر مسلم ممالک میں لڑکیوں کی تعلیم کے حوالے سے متفقہ “اسلام آباد ڈیکلریشن” جاری کیا جائے گا، ڈیکلریشن خواتین کی تعلیم کے فروغ کے حوالے سے ایک سنگ میل ثابت ہوگا، دنیا بھر سے اپنے شعبوں کے نامور جید علماء، اسکالرز اور ماہرین تعلیم حصہ لے رہے ہیں۔
انہوں نے کہا کہ کانفرنس خواتین کی تعلیم اور اسلام و فوبیا جیسے اہم موضوعات کے بارے میں غلط فہمیاں دور کرنے میں معاون ثابت ہوگی۔
وزیرِ اعظم نے ملاقات میں پاکستان کے سعودیہ عرب کے ساتھ دیرینہ برادرانہ تعلقات کا ذکر کیا اور سعودی فرمانروا شاہ سلمان بن عبدالعزیر اور سعودی ولی عہد محمد بن سلمان کیلئے نیک خواہشات کا اظہار کیا۔
ملاقات میں وزیرِ اعظم نے مشرق وسطی کی صورتحال پر گفتگو کرتے ہوئے اسرائیل کی جانب سے نہتے فلسطینیوں پر جاری مظالم کی مزمت کی اور صورتحال کی بہتری کیلئے عالمی دنیا کے مؤثر کردار کی اہمیت پر زور دیا۔
