کوئٹہ کے علاقے سنجدی میں واقع کوئلہ کان میں گیس دھماکے کے باعث 12 کانکن زیر زمین پھنس گئے، جنہیں نکالنے کے لیے ریسکیو آپریشن شروع کر دیا گیا ہے۔
چیف مائنز آفیسر عبدالغنی بلوچ کے مطابق دھماکے کی شدت کے باعث کان کا اندرونی حصہ منہدم ہو چکا ہے، جس کے نتیجے میں مزدور کان کے اندر محصور ہو گئے ہیں۔
چیف مائنز آفیسر نے مزید بتایا کہ یہ واقعہ تقریباً ایک گھنٹہ قبل پیش آیا، جس کی اطلاع موصول ہوتے ہی امدادی کارروائیاں شروع کر دی گئی ہیں۔
انہوں نے امید ظاہر کی کہ تمام کانکنوں کو بحفاظت نکالنے کی ہر ممکن کوشش کی جائے گی۔
بلوچستان حکومت کے ترجمان شاہد رند کے مطابق ریسکیو ٹیمیں جائے حادثہ پر پہنچ چکی ہیں اور امدادی سرگرمیاں جاری ہیں۔
صوبائی وزیر معدنیات میر شعیب نوشیروانی نے چیف انسپکٹر مائنز کو فوری طور پر مزید دو ٹیمیں روانہ کرنے کی ہدایت کی ہے تاکہ ریسکیو آپریشن کو تیز کیا جا سکے۔
میر شعیب نوشیروانی نے واضح کیا کہ اگر واقعے میں کانکنی کے طریقہ کار کی خلاف ورزی ثابت ہوئی تو ملوث افراد کے خلاف سخت قانونی کارروائی کی جائے گی۔
ان کا کہنا تھا کہ انسانی جانوں سے بڑھ کر کوئی مائن اونر نہیں ہو سکتا اور حکومت مزدوروں کے حقوق اور ان کی حفاظت کے لیے ہر ممکن اقدامات کرے گی۔
صوبائی وزیر نے مائنز ڈیپارٹمنٹ کو ہدایت کی کہ وہ کانوں میں حادثات کی روک تھام کے لیے جدید سہولیات فراہم کرے تاکہ مستقبل میں ایسے واقعات سے بچا جا سکے۔
