پاکستان مشکلات پر جلد قابو پالے گا، وزیر خارجہ
لاہور: وزیر خارجہ اسحاق ڈار نے کہا ہے کہ پاکستان مشکلات پر جلد قابو پالے گا۔
وفاقی وزیر خارجہ اسحاق ڈار نے مسلم لیگ ن انٹرنیشنل افیئرز کے زیر اہتمام آن لائن کانفرنس سے خطاب کرتے ہوئے کہا کہ ہم عالمی تنہائی سے نکل رہے ہیں، وزیراعظم محمد شہباز شریف ملک کو ترقی کی راہ پر ڈالنے کے لئے دن رات انتھک محنت کر رہے ہیں۔
انہوں نے کہا کہ بطور صدر مسلم لیگ ن اوورسیز آپ لوگوں کو حکومتی کارکردگی سے آگاہ کرنا میری ذمہ داری ہے، کوشش ہوتی ہے کہ اپنی ذمہ داریوں کےساتھ ساتھ آپ کے خیالات سے بھی آگاہ رہوں۔
اس موقع پر مسلم لیگ ن کے صدور اور شرکاء نے اسحاق ڈار کو وزیر خارجہ اور سینیٹ کا رکن بننے پر مبارکباد دی۔
دوسری جانب چیف کوآرڈینیٹر بیرسٹر امجد ملک نے کانفرنس کے مقاصد سے پر روشنی ڈالی اور کہا کہ حکومت ملک میں سیاسی استحکام کی کوشش کررہی ہے۔
بیرسٹر امجد ملک نے کہا کہ حکومت تارکین وطن سے کئے وعدے پورےکرنے میں سنجیدہ ہے، ن لیگ کےمنشور کے مطابق اوورسیز پاکستانیوں کیلئے مخصوص نشستوں کا معاملہ جلد حل ہوگا، ون ونڈو سرمایہ کاری کی سہولت، مخصوص امیگریشن کاؤنٹرز، خصوصی عدالتیں زیرغور ہیں۔
کانفرنس میں مسلم لیگ ن امریکہ کے صدر راحیل ڈار، صدر سعودی عرب شیخ سیعد احمد،برطانیہ سے لیگل ونگ کے صدر چوہدری عنصر محمود،جاپان سے صدر ملک نور اعوان، کینیڈا سے صدر سہیل وڑائچ، متحدہ عرب امارات سے محمد غوث قادری اور درجنوں ممالک سے ن لیگ صدور شریک ہوئے۔
