ویمنز انڈر 19 ورلڈکپ؛ پاکستانی ٹیم کا تربیتی کیمپ شروع
کراچی: آئی سی سی ویمنز انڈر 19 ورلڈ کپ کے لیے پاکستانی ٹیم کا تربیتی کیمپ شروع ہوگیا۔
آئی سی سی ویمنز انڈر 19 ورلڈ کپ کے لیے پاکستانی ٹیم کا تربیتی کیمپ شروع ہوگیا ہے جب کہ کھلاڑیوں اور کوچنگ اسٹاف نے سال نو کی آمد پر پریکٹس سے قبل خصوصی دعا کی۔
پاکستان ویمنز انڈر 19 ٹیم کی کھلاڑیوں نے حنیف محمد ہائی پرفارمنس سینٹر نیشنل اسٹیڈیم کراچی میں پریکٹس کی جب کہ کھلاڑیوں نے صبح اور سہ پہر دو پریکٹس سیشن میں حصہ لیا۔
مارننگ سیشن میں کھلاڑیوں نے فیلڈنگ اور رننگ بٹوین وکٹ کی پریکٹس کی، کھلاڑیوں نے آفٹر نون سیشن میں فیلڈنگ اور بولنگ کے تربیتی سیشن میں حصہ لیا۔
تربیتی کیمپ کی نگرانی ہیڈ کوچ محسن کمال نے کی جب کہ اسسٹنٹ کوچ محمد حنیف ملک اور فیلڈنگ کوچ ناہیدہ خان نے کھلاڑیوں کو ٹپس دیں۔
انڈر 19 ویمنز ٹیم کا تربیتی کیمپ 9 جنوری تک جاری رہے گا، ویمنز انڈر 19 ٹیم 10 جنوری کو براستہ دبئی ملائشیا روانہ ہوگی۔
