وزیر اعلیٰ سندھ سید مراد علی شاہ نے گڑھی خدا بخش بھٹو میں صحافیوں سے گفتگو کرتے ہوئے کہا کہ وہ شہید محترمہ بے نظیر بھٹو کی 17 ویں برسی کے انتظامات کا جائزہ لینے کے لیے یہاں آئے ہیں۔
انہوں نے بتایا کہ برسی کی تقریب میں صدر آصف علی زرداری، چیئرمین پیپلز پارٹی بلاول بھٹو زرداری سمیت پارٹی قائدین، رہنما اور کارکنان بڑی تعداد میں شرکت کریں گے۔
وزیر اعلیٰ سندھ نے کہا کہ اس موقع پر صدر پاکستان اور بلاول بھٹو سیاسی ملکی صورتحال اور درپیش مسائل پر عوام کو آگاہ کریں گے۔
انہوں نے کراچی میں پانی کی صورتحال پر بات کرتے ہوئے کہا کہ بدقسمتی سے پائپ لائن میں خرابی کے باعث پانی کی شارٹج کا سامنا کرنا پڑا ہے، تاہم کراچی میں مطلوبہ مقدار کے مطابق پانی دستیاب ہے۔
سید مراد علی شاہ نے مزید کہا کہ کے فور منصوبے کے ایک حصے پر وفاقی حکومت جبکہ تین حصوں پر سندھ حکومت کام کر رہی ہے۔
انہوں نے یہ بھی بتایا کہ سندھ حکومت پانی کی فراہمی کے لیے نئی نہر بنا رہی ہے، جس کا کام ریکارڈ وقت میں مکمل کر لیا جائے گا۔
وزیر اعلیٰ سندھ نے کہا کہ سندھ میں مزید کینال بنانے کا فائدہ نہیں جب تک پانی کی فراہمی کا مسئلہ حل نہ ہو، اور سب سے پہلے پانی کی بچت کے طریقے اپنانا ہوں گے۔
انہوں نے کہا کہ آصف علی زرداری کے احکامات ہیں کہ پانی کی بچت کے لیے اقدامات کیے جائیں۔
سید مراد علی شاہ نے مزید کہا کہ ڈیم میں پانی صرف تب ہی اسٹور کیا جا سکتا ہے جب پانی دستیاب ہو۔ انہوں نے ایک سے چار گریڈ کی ملازمتوں پر عدالتی فیصلے کا ذکر کرتے ہوئے کہا کہ امن و امان کی صورتحال بہت بہتر ہے۔
وزیر اعلیٰ سندھ نے کہا کہ حالات بکل درست نہیں ہیں لیکن پہلے سے بہتر ہیں۔
شکارپور سمیت وہ علاقے جہاں ڈاکوؤں کا قبضہ تھا، وہاں ترقیاتی کام شروع کیے جائیں گے تاکہ ان علاقوں کی حالت بہتر ہو سکے۔
