دنیا کے معروف ترین ٹک ٹاکر خابی لیم نے عمرے کی سعادت حاصل کر لی
ٹک ٹاک پر دنیا بھر میں سب سے زیادہ فالو کیے جانے والے معروف سینیگالی ٹک ٹاکر خابی لیم نے عمرے کی سعادت حاصل کر لی ہے۔
حال ہی میں معروف ٹک ٹاکر خابی لیم نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر بیت اللّٰہ سے تصاویر و ویڈیوز شیئر کرتے ہوئے اپنے مداحوں کو عمرے کی سعادت حاصل کرنے کی خوشخبری سُنائی۔
تصاویر میں انہیں خانہ کعبہ کے سامنے احرام میں ملبوس دیکھا جا سکتا ہے، عمرے کی سعادت حاصل ہونے پر انہوں نے اللّٰہ تعالیٰ کا شکر ادا کیا۔
انہوں نے شیئر کی گئیں تصاویر کے کیپشن میں لکھا کہ میں صرف الحمدلِلّٰہ کہنا چاہتا ہوں، خدا نے مجھے سب کچھ دیا ہے، بالخصوص اس نے مجھے آگے بڑھنے اور اپنے خوابوں پر یقین کرنے کی طاقت عطاء کی ہے۔
ان کا کہنا تھا کہ میں نے زندگی میں بہت سی مشکلات کا سامنا کیا ہے، جب سب کچھ ناممکن نظر آتا تھا تو یہ میرا ایمان تھا جس نے مجھے ثابت قدم رکھا، اللّٰہ تیرا شکر ہے کہ تو ہی میری واحد امید ہے۔
یاد رہے کہ اٹلی میں مقیم 24 سالہ سینیگالی یوٹیوبر و کامیڈین خابی لیم اپنی خاموش کامیڈی اور صرف ہاتھوں کے اشاروں سے مزاحیہ ویڈیوز اور مشکل ’لائف ہیکس‘ کو آسان کر کے دکھانے سے متعلق کافی شہرت رکھتے ہیں۔
