پی آئی اے نجکاری، آئی ایم ایف نے سیلز ٹیکس چھوٹ اور ایکویٹی لاسز ختم کرنے کا مطالبہ مان لیا
عالمی مالیاتی ادارے (آئی ایم ایف) نے پی آئی اے نجکاری کے لیے سیلز ٹیکس چھوٹ اور ایکویٹی لاسز ختم کرنے کے مطالبات مان لیے۔
ذرائع کے مطابق پی آئی اے خریدار پارٹی کو نیشنل اور انٹرنیشنل روٹس کیلئے طیارے خریدنے یا لیز پر لینے کیلئے سیلز ٹیکس چھوٹ ہو گی۔
ذرائع کا کہنا ہے کہ سیلز ٹیکس چھوٹ ملنے اور نقصانات ختم ہونے سے بڈنگ 250 ارب روپے سے لے کر 350 ارب روپے تک جا سکتی ہے۔
ذرائع کا مزید کہنا ہے کہ پی آئی اے کا تقریبا 660 ارب روپے کا قرض حکومت نے اپنے ذمہ لے کر ہولڈنگ کمپنی میں اسٹاک کر دیا ہے۔ پی آئی اے کی نجکاری اور روزویلٹ ہوٹل کی فروخت سے ملنے والی رقم کو ادائیگیاں کرنے کیلئے سیٹل کیا جائے گا۔
پی آئی اے ہولڈنگ کمپنی کے قرض کو سیٹل کرنے کیلئے بھی آئی ایم ایف کی جانب سے منظوری دے دی گئی ہے۔ روزویلٹ ہوٹل کی فروخت کیلئے 6 ماہ میں جوائنٹ وینچر قائم کر کے تقریبا ایک بلین ڈالر تک میں فروخت کیے جانے کا تخمینہ لگایا گیا ہے۔
ذرائع کا کہنا ہے کہ وزیر اعظم کو پی آئی اے کیلئے ٹیکس چھوٹ، نقصانات ختم اور روز ویلٹ ہوٹل کی فروخت کیلئے جوائنٹ وینچر پر بریفنگ دی گئی۔
پہلے آئی ایم ایف نے صرف انٹرنیشنل روٹس کیلئے طیاروں کی خریداری یا لیز پر سیلز ٹیکس چھوٹ کی اجازت دی تھی۔ دوبارہ درخواست پر مقامی روٹس کیلئے طیاروں کی خریداری اور لیز پر حاصل کرنے کیلئے بھی سیلز ٹیکس چھوٹ کی رعایت دی گئی۔
پی آئی اے کے لیز پر طیاروں کو ماہانہ تقریبا 81 لاکھ روپے تک سیلز ٹیکس چھوٹ کی سہولت حاصل ہو سکے گی۔
